मुंबई – महाराष्ट्रात स्थानिक स्वराज्य संस्थांच्या निवडणुकांच्या पार्श्वभूमीवर सर्वोच्च न्यायालयाने महत्त्वाचा दिलासा देणारा आदेश दिला आहे. जिल्हा परिषद निवडणुकांसाठी राज्य निवडणूक आयोगाला अतिरिक्त वेळ देण्यात येत असून, आता 15 फेब्रुवारी 2026 पर्यंत जिल्हा परिषदेच्या निवडणुका पूर्ण करण्याचे स्पष्ट निर्देश न्यायालयाने दिले आहेत. या निर्णयामुळे राज्य निवडणूक आयोगाला मोठा दिलासा मिळाला आहे.
याआधी सर्वोच्च न्यायालयाने 31 जानेवारी 2026 पर्यंत सर्व स्थानिक स्वराज्य संस्थांच्या निवडणुका पूर्ण करण्याचे आदेश दिले होते. मात्र प्रत्यक्ष अंमलबजावणीदरम्यान प्रलंबित आरक्षण, मतदारसंघ रचना, प्रशासकीय तयारी तसेच कायदेशीर प्रक्रियांमुळे अडचणी निर्माण होत असल्याचे कारण पुढे करत राज्य निवडणूक आयोगाने न्यायालयात अर्ज दाखल केला होता.
या अर्जावर सुनावणी करताना सर्वोच्च न्यायालयाने परिस्थितीचा विचार करून जिल्हा परिषद निवडणुकांसाठी मर्यादित कालावधीची मुदतवाढ मंजूर केली आहे. त्यामुळे आता राज्य निवडणूक आयोगाकडे निवडणूक प्रक्रिया अधिक शिस्तबद्ध आणि नियोजनबद्ध पद्धतीने पूर्ण करण्याची संधी उपलब्ध झाली आहे.
दरम्यान, या निर्णयामुळे राज्यातील राजकीय हालचालींना वेग येण्याची शक्यता असून, आगामी काळात जिल्हा परिषद निवडणुकांचे बिगुल वाजणार असल्याचे स्पष्ट झाले आहे.
