नवी दिल्ली | प्रतिनिधी :
भारताच्या राष्ट्रपती श्रीमती द्रौपदी मुर्मू यांनी केंद्रीय शिक्षण मंत्री धर्मेंद्र प्रधान यांचा राजीनामा स्वीकारला आहे.
राष्ट्रपती भवनाकडून जारी करण्यात आलेल्या आदेशानुसार, केंद्रीय ग्राहक व्यवहार, अन्न व सार्वजनिक वितरण तसेच नवीन आणि नवीकरणीय ऊर्जा मंत्री प्रल्हाद जोशी यांच्याकडे शिक्षण मंत्रालयाचा अतिरिक्त कार्यभार सोपविण्यात आला आहे. नियमित शिक्षण मंत्र्यांची नियुक्ती होईपर्यंत ते हा अतिरिक्त कार्यभार सांभाळणार आहेत.
धर्मेंद्र प्रधान यांच्या राजीनाम्यानंतर केंद्र सरकारने शिक्षण मंत्रालयाचा कारभार अखंडित सुरू राहावा, यासाठी ही अंतरिम व्यवस्था केली आहे. या निर्णयामुळे राष्ट्रीय शिक्षण धोरण, उच्च शिक्षण, शालेय शिक्षण आणि विविध केंद्रीय शैक्षणिक योजनांशी संबंधित कामकाजाची जबाबदारी आता प्रल्हाद जोशी यांच्याकडे असेल.
धर्मेंद्र प्रधान यांच्या राजीनाम्याची पार्श्वभूमी आणि शिक्षण मंत्रालयातील पुढील घडामोडींवर आता देशभराचे लक्ष लागले आहे.
