मुंबई : (प्रतिनिधी)जवळपास दोन दशकांनंतर राज ठाकरे आणि उद्धव ठाकरे हे दोन्ही ठाकरे बंधू एकत्र व्यासपीठावर येत असून, आगामी महापालिका निवडणुकांसाठी शिवसेना–मनसे युती एकत्र लढणार असल्याच्या पार्श्वभूमीवर त्यांची ऐतिहासिक महामुलाखत चर्चेचा केंद्रबिंदू ठरली आहे. या महामुलाखतीचा पहिला टीझर नुकताच प्रदर्शित झाला असून, त्याने महाराष्ट्राच्या राजकारणात मोठी खळबळ उडवली आहे.
शिवसेना खासदार संजय राऊत आणि प्रसिद्ध दिग्दर्शक-लेखक महेश मांजरेकर यांनी दोन्ही ठाकरे बंधूंची ही संयुक्त मुलाखत घेतली आहे. या मुलाखतीत विविध राजकीय, सामाजिक आणि विशेषतः मुंबईच्या भवितव्यावर मनमोकळेपणाने चर्चा करण्यात आली आहे. महेश मांजरेकर यांनी मुंबईबाबत ठाकरे बंधूंना केलेले एक थेट विधान सध्या सर्वत्र चर्चेचा विषय ठरत आहे.
आगामी महापालिका निवडणुकांमध्ये शिवसेना–मनसे युती एकत्र लढणार असल्याने राज्यातील राजकीय समीकरणे मोठ्या प्रमाणात बदलणार आहेत. या युतीवर महाराष्ट्रातील नागरिक विश्वास दाखवतात की नाही, हे १५ जानेवारी रोजी होणाऱ्या राज्यातील २९ महापालिकांच्या मतदानातून स्पष्ट होणार असून, १६ जानेवारीला निकाल जाहीर होणार आहे.
निवडणुका अवघ्या आठवड्याभरावर येऊन ठेपल्या असतानाच राज्यभर राज ठाकरे आणि उद्धव ठाकरे यांच्या सभांचा धडाका उडणार आहे. मात्र त्याआधीच दोघांची एकत्रित संयुक्त मुलाखत नागरिकांना पाहायला मिळणार आहे, याकडे सर्वांचे लक्ष लागले आहे.
या महामुलाखतीत ठाकरे बंधूंनी विविध विषयांवर स्पष्ट भूमिका मांडल्या असून, त्यातच राज ठाकरे यांनी उपमुख्यमंत्री देवेंद्र फडणवीस यांच्यावर टीकास्त्र सोडल्याचे टीझरमधून दिसून येते. त्यामुळे ही महामुलाखत केवळ संवाद न राहता, आगामी निवडणुकांच्या पार्श्वभूमीवर एक महत्त्वाचा राजकीय संदेश देणारी ठरणार आहे.
महाराष्ट्रातील तमाम प्रेक्षकांना ही बहुचर्चित ठाकरे बंधूंची महामुलाखत ८ आणि ९ जानेवारी रोजी पाहता येणार असून, त्यातून पुढील राजकीय घडामोडींना नवे वळण मिळण्याची शक्यता व्यक्त केली जात आहे.
