नवी दिल्ली : कर्मचारी भविष्य निर्वाह निधी संघटनेने (EPFO) पीएफ काढण्याबाबत एक महत्त्वाची अपडेट जारी केली आहे. सूत्रांनी दिलेल्या माहितीनुसार, ईपीएफओ सदस्यांना लवकरच UPI च्या माध्यमातून त्यांच्या पीएफ खात्यांमधील पैसे काढण्याची सुविधा उपलब्ध होणार आहे. यासंदर्भात निधी हस्तांतरणाची प्रक्रिया आणि मर्यादाही स्पष्ट करण्यात आल्या आहेत.
EPFO सूत्रांनुसार, केंद्र सरकार UPI द्वारे EPF खात्यांमधून निधी काढण्याची सुविधा सुरू करण्याच्या तयारीत आहे. या सुविधेचा फायदा कर्मचारी भविष्य निर्वाह निधी संघटनेशी संलग्न असलेल्या ८ कोटींहून अधिक सदस्यांना होणार असून, कोणत्याही कागदपत्रांच्या अडचणीशिवाय UPI अॅपच्या माध्यमातून थेट बँक खात्यात पीएफ रक्कम हस्तांतरित करता येणार आहे.
सूत्रांनी स्पष्ट केले आहे की, ही सुविधा वापरण्यासाठी पीएफ खाते प्रथम UPI शी लिंक केलेले असणे आवश्यक आहे. तसेच संबंधित बँक खाते आधारशी जोडलेले असणे बंधनकारक राहणार आहे. त्यानंतर पीएफ खात्यातील जमा रक्कम UPI शी लिंक केलेल्या बचत खात्यात हस्तांतरित केली जाईल. ही रक्कम नंतर डेबिट कार्ड किंवा बँक एटीएमद्वारे सहजपणे काढता किंवा वापरता येईल.
दरम्यान, कामगार मंत्रालय UPI च्या माध्यमातून ईपीएफओ सदस्यांना पीएफ रक्कम काढता यावी यासाठी स्वतंत्र अॅप्लिकेशन लाँच करण्याच्या तयारीत आहे. या अॅपद्वारे सदस्यांना UPI वापरून थेट त्यांच्या बचत खात्यात पीएफ निधी हस्तांतरित करता येणार आहे. याशिवाय, ईपीएफओच्या अधिकृत वेबसाइटवरील सदस्य पोर्टलवरही UPI-टू-बँक खाते हस्तांतरणाची सुविधा सक्षम करण्याची प्रक्रिया सुरू आहे.
सूत्रांच्या माहितीनुसार, ही सुविधा पुढील आर्थिक वर्षाच्या सुरुवातीपासून उपलब्ध होण्याची शक्यता आहे. UPI पीएफ खात्याशी लिंक झाल्यानंतर ही सेवा सक्रिय होईल. नियमांनुसार, या नव्या सुविधेद्वारे पीएफ खात्यातील ७५ टक्के शिल्लक रक्कम कोणत्याही कागदपत्रांशिवाय काढता येणार आहे. मात्र मासिक आणि दैनिक व्यवहार मर्यादा निश्चित करण्याबाबत सध्या चर्चा सुरू असल्याचेही सूत्रांनी सांगितले आहे.
या सुविधेमुळे पीएफ काढण्याची प्रक्रिया अधिक सुलभ, वेगवान आणि डिजिटल होणार असून, कामगार व कर्मचाऱ्यांना मोठा दिलासा मिळणार आहे.
