Sindhudurg pride: Kasarde school student Saavi Mudrale selected at national level in Project Veer Gatha 5.0. Felicitation held at Talere No.1 school.
कणकवली/कासार्डे : सिंधुदुर्ग जिल्ह्याच्या शिरपेचात मानाचा तुरा रोवला गेला असून कणकवली तालुक्यातील कासार्डे माध्यमिक विद्यालयाच्या सहावीतील विद्यार्थिनी कु. सावी मुद्राळे हिची केंद्र सरकारच्या अत्यंत प्रतिष्ठेच्या ‘प्रोजेक्ट वीर गाथा 5.0’ या उपक्रमात राष्ट्रीय स्तरावर निवड झाली आहे. या उल्लेखनीय यशाबद्दल प्राथमिक शाळा तळेरे नं. 1 यांच्या वतीने ‘कोकणकन्या’ सावी मुद्राळे हिचा विशेष सत्कार करण्यात आला.
‘प्रोजेक्ट वीर गाथा’ हा उपक्रम केंद्र सरकारच्या संरक्षण मंत्रालय आणि शिक्षण मंत्रालय यांच्या संयुक्त विद्यमाने राबवला जातो. देशाच्या स्वातंत्र्यासाठी आणि सुरक्षेसाठी योगदान दिलेल्या वीर जवानांच्या शौर्यगाथा विद्यार्थ्यांपर्यंत पोहोचाव्यात, या उद्देशाने हा प्रकल्प राबवण्यात येतो. देशभरातील लाखो विद्यार्थ्यांमधून निवड होऊन सावी मुद्राळे हिने राष्ट्रीय स्तरावर आपले नाव उज्ज्वल केले आहे.
सावी मुद्राळेच्या यशामुळे कासार्डे, तळेरे परिसरात आनंदाचे वातावरण निर्माण झाले आहे. प्राथमिक शाळा तळेरे नं. 1 येथे आयोजित सत्कार समारंभात शिक्षक, पालक, ग्रामस्थ आणि विद्यार्थी उपस्थित होते. सावीच्या मेहनतीचे कौतुक करत उपस्थितांनी तिच्या पुढील शैक्षणिक वाटचालीसाठी शुभेच्छा दिल्या.
या यशामागे सावीला मिळालेले शिक्षकांचे मार्गदर्शन आणि पालकांचा मोलाचा पाठिंबा महत्त्वाचा ठरल्याचे शाळा प्रशासनाने नमूद केले. लहान वयात राष्ट्रीय स्तरावर निवड होणे ही बाब इतर विद्यार्थ्यांसाठी प्रेरणादायी असल्याचेही शिक्षकांनी सांगितले.
सावी मुद्राळेच्या या यशामुळे सिंधुदुर्ग जिल्ह्यातील विद्यार्थ्यांमध्ये उत्साह निर्माण झाला असून, ग्रामीण भागातील विद्यार्थ्यांनीही राष्ट्रीय स्तरावर चमकदार कामगिरी करू शकते, हे पुन्हा एकदा सिद्ध झाले आहे.
