१७ वर्षांखालील मुलांचा संघ जिल्हास्तरीय स्पर्धेसाठी पात्र
मालवण, दि. प्रतिनिधी : क्रीडा व युवक सेवा संचालनालय, महाराष्ट्र राज्य, पुणे तसेच जिल्हा क्रीडा अधिकारी कार्यालय आणि जिल्हा क्रीडा परिषद, सिंधुदुर्ग यांच्या वतीने आयोजित मालवण तालुकास्तरीय शालेय क्रीडा स्पर्धा २०२६-२७ मध्ये मालवण येथील **रोझरी इंग्लिश स्कूलच्या १७ वर्षांखालील मुलांच्या कबड्डी संघाने दिमाखदार कामगिरी करत तालुकास्तरीय विजेतेपद पटकावले आहे. या विजयासह रोझरी इंग्लिश स्कूलच्या संघाने जिल्हास्तरीय स्पर्धेत प्रवेश मिळविला असून आता हा संघ मालवण तालुक्याचे प्रतिनिधित्व करणार आहे.
अंतिम सामन्यात रोझरी इंग्लिश स्कूलच्या संघाने कट्टा संघावर मात करत विजेतेपदावर आपले नाव कोरले. संघातील खेळाडूंनी उत्कृष्ट सांघिक खेळ, चपळाई आणि आक्रमक खेळीचे प्रदर्शन करत हे यश संपादन केले.
तालुकास्तरीय स्पर्धेतील या विजेतेपदानंतर रोझरी इंग्लिश स्कूलचा कबड्डी संघ जिल्हास्तरीय स्पर्धेसाठी सज्ज झाला आहे. जिल्हास्तरावर मालवण तालुक्याचे नेतृत्व करण्याची संधी मिळाल्याने खेळाडूंसह शाळा प्रशासनात उत्साहाचे वातावरण आहे.
या यशामागे संघाचे प्रशिक्षक जेरी फर्नांडिस, हितचिंतक जे. व्ही. फर्नांडिस तसेच मार्गदर्शक आणि सहकाऱ्यांचे मोलाचे योगदान लाभले आहे. त्यांच्या मार्गदर्शनाखाली संघाने सातत्यपूर्ण सराव करत तालुकास्तरीय स्पर्धेत विजेतेपदाला गवसणी घातली.
रोझरी इंग्लिश स्कूलच्या संघाने तालुकास्तरीय कबड्डी स्पर्धेचे विजेतेपद पटकावल्याबद्दल शाळेचे मुख्याध्यापक फादर ॲन्थनी डिसोझा यांच्यासह संपूर्ण शिक्षकवृंद व शिक्षकेतर कर्मचाऱ्यांनी संघाचे अभिनंदन केले. तसेच प्रशालेचे आजी-माजी विद्यार्थी, विद्यार्थिनी आणि पालकांनीही खेळाडूंचे कौतुक करत जिल्हास्तरीय स्पर्धेतील पुढील वाटचालीसाठी शुभेच्छा दिल्या आहेत.
