नवी दिल्ली : केंद्रीय शिक्षक पात्रता परीक्षा अर्थात CTET २०२६ देणाऱ्या उमेदवारांसाठी महत्त्वाची बातमी आहे. ६ सप्टेंबर २०२६ रोजी होणारी CTET परीक्षा पुढे ढकलण्यात आली आहे. केंद्रीय माध्यमिक शिक्षण मंडळ अर्थात CBSEने आपल्या अधिकृत संकेतस्थळावर परीक्षा स्थगित करण्याबाबतची माहिती जाहीर केली आहे.
CTET २०२६ परीक्षा स्थगित करण्याचा तसेच अर्ज प्रक्रिया पुन्हा सुरू करण्याचा निर्णय सर्वोच्च न्यायालयाच्या निर्देशांच्या पार्श्वभूमीवर घेण्यात आल्याची माहिती CBSEकडून देण्यात आली आहे. उमेदवारांचे हित लक्षात घेऊन परीक्षा प्रक्रियेत आवश्यक बदल करण्यात येत असल्याचे स्पष्ट करण्यात आले आहे.
शिक्षक पात्रता मिळवू इच्छिणाऱ्या उमेदवारांना परीक्षा देण्यासाठी पुरेशी आणि न्याय्य संधी उपलब्ध करून देण्याच्या गरजेवर सर्वोच्च न्यायालयाने भर दिला होता. त्यामुळे परीक्षा प्रक्रियेबाबत फेरविचार करून उमेदवारांना अर्ज करण्याची आणखी संधी देण्याचा निर्णय घेण्यात आला आहे.
CTET ही देशभरातील शिक्षक पदांसाठी आवश्यक पात्रता निश्चित करणाऱ्या महत्त्वाच्या परीक्षांपैकी एक आहे. त्यामुळे ६ सप्टेंबरची परीक्षा पुढे ढकलण्यात आल्याने परीक्षेची तयारी करणाऱ्या हजारो उमेदवारांवर त्याचा थेट परिणाम होणार आहे. मात्र, नव्याने अर्ज करण्याची संधी मिळणार असल्याने काही उमेदवारांना यामुळे दिलासा मिळण्याची शक्यता आहे.
दरम्यान, CTET परीक्षेची नवी तारीख अद्याप जाहीर करण्यात आलेली नाही. CBSEकडून लवकरच सुधारित परीक्षा वेळापत्रक जाहीर केले जाण्याची शक्यता आहे. त्यामुळे उमेदवारांनी CTETच्या अधिकृत संकेतस्थळावरील पुढील सूचनांकडे लक्ष ठेवावे.
परीक्षा पुढे ढकलण्यात आल्याने उमेदवारांना अतिरिक्त तयारीसाठी वेळ मिळणार असून, नव्या वेळापत्रकानुसार अभ्यासाचे नियोजन करण्याची संधीही मिळणार आहे.
