🎤 विशेष मुलाखत
सौ. ममता मनमोहन वराडकर
(शिवसेना – नगराध्यक्ष पदाच्या उमेदवार, मालवण नगरपालिका)
प्रश्न : आपली उमेदवारी जाहीर झाल्यानंतर शहरात उत्स्फूर्त प्रतिसाद दिसतोय. याचे कारण काय वाटते?
सौ. ममता वराडकर :
मी दोन वेळा नगरसेविका म्हणून सेवा केली आहे. बोलण्यापेक्षा काम करण्यावर माझा अधिक भर राहिला. माझ्या प्रभागातील नागरिकांनी मला दोनदा निवडून दिले—तो माझ्यावरचा विश्वास आहे. माझे सासरे स्व. अनंत अर्जुन वराडकर यांनी नगरपालिकेत प्रामाणिक सेवा केली. पती मनमोहन वराडकर यांनी आपल्या व्यवसायातून लोकसेवा केली. हा वारसा मला प्रेरणा देणारा आहे. त्यामुळे माझी उमेदवारी लोकांनी आनंदाने स्वीकारली.
प्रश्न : आपल्या कार्यकाळात प्रभाग सहाच्या विकासासाठी कोणती कामे केली?
सौ. वराडकर :
प्रभाग सहा हा ऐतिहासिक वारसा असलेला भाग आहे. राजकोट किल्ला, रॉक गार्डन, चिवला बीच, मेढा-राजकोट हे सर्व ठिकाणे पर्यटनाचे प्रमुख केंद्र. चौदा वर्षांत या भागाच्या पर्यटन विकासासाठी जे करता येईल ते सर्व केले—शासनाकडून निधी मिळवणे, सुशोभीकरणाची कामे, सुरक्षा उपाययोजना, स्वच्छतेवर भर—अनेक गोष्टी साध्य झाल्या.
प्रश्न : आपली राजकीय प्रेरणा कोण?
सौ. वराडकर :
शिवसेनेचे मार्गदर्शक माजी मुख्यमंत्री, खासदार नारायण राणे हे माझे राजकीय गुरु आहेत. त्यांच्या नेतृत्वाखाली काम करण्याची संधी मला मिळाली. आमदार निलेश राणे आणि शिवसेना जिल्हाप्रमुख दत्ता सामंत हे आमचे खंबीर नेतृत्व. त्यांच्या मार्गदर्शनाने आम्ही ही निवडणूक लढत आहोत.
प्रश्न : मालवण शहराच्या विकासाबाबत तुमची प्रमुख भूमिका काय राहील?
सौ. वराडकर :
मालवणच्या विकासाचा पाया मजबूत करण्याचे काम आमदार निलेश राणे यांनी गेल्या वर्षभरात केले. सुमारे २० कोटी रुपयांचा निधी त्यांनी आणला—दांडीवरील ९ कोटींचा धूपप्रतिबंधक बंधारा, ४ कोटींचे क्रीडा संकुल, २ कोटींची स्वच्छता कामे, अग्निशामक केंद्र, रस्ते आणि गटारांसाठी निधी, ट्रान्सफॉर्मर, पर्यटन सुविधा—इतका निधी एका वर्षात कोणी आणला नव्हता.
याच कामांना पुढे नेणे, पारदर्शक आणि चांगले प्रशासन देणे हे माझे प्राधान्य.
प्रश्न : आमदार निलेश राणे यांनी जाहीर केलेली ‘अष्टसूत्री संकल्पना’ आपल्याला कशी वाटते?
सौ. वराडकर :
ही अष्टसूत्री म्हणजे मालवणच्या सर्वांगीण विकासाचा मास्टरप्लॅन आहे. त्यात—
ऐतिहासिक वारसा संवर्धन (शिवसृष्टी, लाईट-साउंड शो,)
मरीन ड्राइव्ह धर्तीवर किनारपट्टी विकास
२४ तास पाणी पुरवठा व पायाभूत सुविधा
जागतिक दर्जाचे कचरा व्यवस्थापन
वाहतूक व्यवस्थापन व बायपास रस्ते
शिक्षण, कौशल्य व रोजगार केंद्रे
कला, मनोरंजन आणि अत्याधुनिक क्रीडा संकुल
पारदर्शक प्रशासन, तक्रार निवारण केंद्र, निर्बिजीकरण योजना
हे सर्व मालवणचे भविष्य बदलणार आहे. आम्हाला सत्ता मिळाल्यास ही अष्टसूत्री पाच वर्षात पूर्ण करण्याची 100% हमी आम्ही देतो.
प्रश्न : आपल्या प्रचारात काहीजण टीका करताना दिसत आहेत. आपण काय म्हणता?
सौ. वराडकर :
निवडणूक चार दिवसांची असते. टीका करणे काहींचा स्वभाव असतो. पण एक गोष्ट मी सांगते—उथळ पाण्याला खळखळाट जास्त असतो.
आमच्याकडे आमदार निलेश राणे आणि दत्ता सामंत यांचे नेतृत्व आहे. खासदार नारायण राणे यांचा आशीर्वाद आहे. त्यामुळे कोणत्याही आव्हानाला सामोरे जाण्याची ताकद आमच्यात आहे.
प्रश्न : शेवटी मालवणवासियांना काय आवाहन कराल?
सौ. वराडकर :
मालवण शहराचा स्वच्छ, सुंदर, सुरक्षित आणि आधुनिक विकास करण्याची संकल्पना आम्ही मांडली आहे. माझ्यासह माझ्या वीसही उमेदवारांना विजय मिळवून दिल्यास—
पारदर्शक प्रशासन, जनतेचे प्रश्न तातडीने सोडविणारी व्यवस्था आणि पुढील पाच वर्षांत अष्टसूत्री विकास पूर्ण करण्याची ग्वाही आम्ही देतो.
शहराचा सर्वांगीण विकास साधण्यासाठी आम्हाला साथ द्या—ही विनंती.
