मालवण नगरपरिषद निवडणुकीच्या पार्श्वभूमीवर शिवसेनेच्या नगराध्यक्ष पदाच्या उमेदवार सौ. ममता वराडकर यांनी आज खासदार नारायण राणे व सौ. निलमताई राणे यांची सदिच्छा भेट घेऊन त्यांचे आशीर्वाद प्राप्त केले. नगराध्यक्ष पदाच्या उमेदवारीनंतर वराडकर यांच्या नेतृत्वाला ही महत्त्वपूर्ण पावती मानली जात आहे.
या भेटीवेळी शिवसेना जिल्हाप्रमुख दत्ता सामंत, शहरप्रमुख दीपक पाटकर, शहर संघटक राजू बिडये तसेच इतर पदाधिकारी उपस्थित होते. सौ. ममता वराडकर यांनी नगरपरिषदेसाठी राबविण्यात येणाऱ्या भविष्यातील विकास आराखड्याविषयी राणे यांना माहिती दिली.
खासदार नारायण राणे यांच्याकडून सदिच्छा आशीर्वाद मिळताच शिवसेना कार्यकर्त्यांमध्ये उत्साहाचे वातावरण निर्माण झाले आहे. मालवण शहरासाठी सुशासन, पारदर्शकता आणि सर्वांगीण विकासाची बांधिलकी असल्याचे वराडकर यांनी यावेळी सांगितले.
पक्षाच्या वरिष्ठ नेतृत्वाचा पाठींबा मिळाल्याने शिवसेनेची निवडणूक मोहीम अधिक बळकट होणार असल्याचे जिल्हा पदाधिकाऱ्यांनी नमूद केले.
