कणकवली नगरपरिषद निवडणुकीच्या तोंडावर राजकीय वातावरण तापले असून भाजप नेते निलेश राणे यांनी शिवसेनेचे नगराध्यक्षपदाचे उमेदवार समीर नलावडे यांच्यावर थेट आणि गंभीर आरोपांची सरबत्ती केली आहे. नलावडे यांच्या प्रभाग क्रमांक ७ मध्ये मोठ्या प्रमाणात ‘बोगस मतदार नोंदणी’ झाल्याचा दावा राणे यांनी केला आहे. समोर आलेल्या दस्तऐवजांमुळे हा वाद अधिक चिघळण्याची शक्यता आहे.
समीर नलावडे हे कणकवलीतील संचयनी भवनासमोर राहतात. त्यांच्या 389 क्रमांकाच्या घरात स्वतः नलावडे कुटुंबीय राहतात, असे नगरपंचायतीच्या नोंदीत आहे. मात्र, या घराच्या मतदारयादीत अचानक 25 जणांची नोंद असल्याचे राणे यांनी उघड केले. यातील अनेक जण जाधव, माणगावकर, मडगावकर, राठोड, शेख, मुल्ला
आदी 9 विविध कुटुंबातील असल्याचे दिसत आहे.
926 चौ. फूटाच्या घरात हे सर्व कसे राहू शकतात? असा सरळ सवाल राणे यांनी उपस्थित केला आहे.
यातील काही जण बिहारमधील रहिवासी असून कणकवलीत चहा विक्रेत्यासारखे व्यवसाय करतात, आणि प्रत्यक्षात नलावडे यांच्या घरात वास्तव्य करतात, अशी नोंद असल्याचे त्यांनी सांगितले.
राणे यांनी दुसरा गंभीर आरोप समीर नलावडे यांच्या मेहुण्या गणेश पारकर यांच्या 422 क्रमांकाच्या घरावर केला आहे. पारकर कुटुंब या घरात राहत असले तरी 30 मतदारांची नोंदणी या पत्त्यावर करण्यात आल्याचा दावा करण्यात आला आहे.
हे घर प्रत्यक्षात अब/क/ड अशा उपविभागांसह व्यावसायिक दुकानांनी भरलेले असून तिथे राहण्याची सोयच नाही, असे राणे यांचे म्हणणे आहे.
यातील मतदारांमध्ये निमकर, बारईत, तेली, वाडकर, पाटील, तत्त्वांगावकर, कुबळ, नागवेकर, जामसंकरे आदी 15 कुटुंबे असल्याचे आरोपपत्रात नमूद केले आहे.
समीर नलावडे यांचे निकटवर्तीय महेश शिरसाट यांच्या 394 क्रमांकाच्या घरात देखील 13 मतदारांची संशयास्पद नोंद असल्याचे राणे यांनी निदर्शनास आणले आहे.
या आकडेवारीसह निलेश राणे यांनी कठोर शब्दात म्हटले आहे की—
“कणकवलीच्या प्रभाग क्रमांक 7 मध्ये मतदारयादीची उघडपणे लूट करण्यात आली आहे. घर क्रमांक 389, 422 आणि 394 मध्ये एकत्र 70 पेक्षा जास्त बोगस मतदार नोंदवून निवडणुकीवर परिणाम करण्याचा प्रयत्न झाला आहे.”
समोर आलेल्या माहितीवरून तीन मोठे प्रश्न निर्माण होत आहेत—
1️⃣ 926 आणि 1200 चौ. फूट जागेत इतक्या कुटुंबे प्रत्यक्षात राहत आहेत का?
2️⃣ व्यावसायिक युनिटमध्ये मतदार नोंद कशी?
3️⃣ कुटुंबीयांच्या घरात मोठ्या प्रमाणात बाहेरील लोकांची नोंद का?
राणे यांनी यावर स्पष्ट भाषेत म्हटले—
“ही मतदारयादीतील संगनमताने केलेली छेडछाड आहे. समीर नलावडे यांनी जनतेसमोर सत्य मांडावे!”
कणकवली निवडणुकीतील हा ‘बोगस मतदार’ वाद आता चांगलाच भडकला असून यामुळे पुढील काही दिवसांत राजकीय घडामोडी आणखी गती घेण्याची शक्यता आहे.
