रत्नागिरी : शिवसेना (उद्धव बाळासाहेब ठाकरे) पक्षाचे नेते आणि माजी पर्यावरणमंत्री आदित्य ठाकरे आज रत्नागिरी जिल्ह्याच्या दौऱ्यावर आहेत. या दौऱ्यात जिल्ह्यातील विविध विकासकामे, रस्त्यांची स्थिती तसेच औद्योगिक परिसरातील प्रश्नांची ते पाहणी करणार आहेत.
आदित्य ठाकरे यांच्या दौऱ्याची सुरुवात डोलवी आणि नागोठणे परिसरातील रस्त्यांच्या पाहणीने होणार आहे. या भागातील रस्त्यांची सद्यस्थिती, वाहतुकीच्या समस्या तसेच प्रलंबित कामांचा ते आढावा घेणार आहेत.
यानंतर माणगाव येथील बायपास रस्त्याचीही पाहणी आदित्य ठाकरे करणार आहेत. बायपासच्या कामाशी संबंधित विविध मुद्दे आणि स्थानिक नागरिकांना भेडसावणाऱ्या वाहतुकीच्या समस्यांबाबत ते माहिती घेण्याची शक्यता आहे.
दौऱ्यात लोटे परशुराम एमआयडीसी परिसरालाही आदित्य ठाकरे भेट देणार आहेत. औद्योगिक क्षेत्रातील विविध प्रश्न, पायाभूत सुविधा आणि स्थानिक पातळीवरील अडचणींची ते पाहणी करणार आहेत.
या पाहणी दौऱ्यानंतर आदित्य ठाकरे यांची पत्रकार परिषद होणार आहे. यावेळी ते रत्नागिरी जिल्ह्यातील रस्ते, विकासकामे, औद्योगिक प्रश्न तसेच दौऱ्यात निदर्शनास आलेल्या विविध बाबींवर आपली भूमिका मांडण्याची शक्यता आहे.
दरम्यान, आदित्य ठाकरे यांच्या रत्नागिरी दौऱ्याकडे राजकीय वर्तुळाचेही लक्ष लागले असून, पत्रकार परिषदेत ते कोणते मुद्दे उपस्थित करतात आणि सरकारवर कोणत्या प्रश्नांवरून निशाणा साधतात, हे पाहणे महत्त्वाचे ठरणार आहे.
