Konkan Railway has discontinued its Car Ro-Ro service due to poor passenger response, with only a handful of vehicles booked for the service
कोकण रेल्वेकडून सुरू करण्यात आलेली कार रो-रो सेवा बंद करण्याचा निर्णय घेण्यात आला आहे. गणेशोत्सवाच्या काळात मुंबई आणि इतर भागांतून कोकणात स्वतःच्या वाहनाने जाणाऱ्या चाकरमान्यांना महामार्गावरील वाहतूक कोंडीपासून दिलासा मिळावा, या उद्देशाने ही सेवा सुरू करण्यात आली होती. मात्र, प्रवाशांकडून अत्यल्प प्रतिसाद मिळाल्याने कोकण रेल्वेला हा प्रयोग बंद करावा लागला आहे.
मागील वर्षापासून कार रो-रो सेवेचा प्रयोग सुरू होता. कोलाड, नांदगाव रोड आणि गोवा (वेर्णा) या मार्गांदरम्यान कार रो-रो वाहतूक सुरू करण्याचे नियोजन करण्यात आले होते. २३ ऑगस्ट २०२५ पासून सेवा सुरू करण्याचे नियोजन करण्यात आले होते, तर सेवेसाठी २९ जुलैपासून आरक्षण सुरू करण्यात आले होते.
मात्र, आरक्षणाला अपेक्षित प्रतिसाद मिळाला नाही. कार रो-रो सेवेसाठी अवघ्या चार-पाच वाहनांचेच बुकिंग झाल्याचे समोर आले. प्रवाशांकडून मागणी नसल्याने ही सेवा सुरू ठेवणे व्यवहार्य नसल्याचे स्पष्ट झाल्यानंतर कोकण रेल्वेने सेवा बंद करण्याचा निर्णय घेतला.
महामार्गावरील विशेषतः गणेशोत्सवाच्या काळातील वाहतूक कोंडी टाळण्यासाठी आणि प्रवाशांची स्वतःची वाहने रेल्वेने कोकणात पोहोचविण्यासाठी ही सेवा सुरू करण्यात आली होती. मात्र, अत्यल्प बुकिंगमुळे कोकण रेल्वेचा हा प्रयोग अपेक्षित यश मिळवू शकला नाही.
महत्त्वाचे म्हणजे, सेवा बंद करण्यामागे प्रवाशांचा अत्यल्प प्रतिसाद हे प्रमुख कारण असल्याचे सांगण्यात येत आहे.
