मालवण नगरपालिका निवडणुकीच्या पार्श्वभूमीवर सुरू असलेल्या गोंधळाला जबाबदार भाजप प्रदेशाध्यक्ष रवींद्र चव्हाण असल्याचा आरोप पुन्हा एकदा तिखट शब्दांत करत मालवणचे आमदार निलेश राणे यांनी आज प्रसारमाध्यमांशी संवाद साधताना सरळ निशाणा साधला. “चव्हाण आणि त्यांची माणसे यातून सुटणार नाहीत”, असा इशारा देतानाच “दोन तारखेपर्यंत युती टिकवायची” या चव्हाणांच्या वक्तव्याचा अर्थ म्हणजे मित्रपक्षाला दिलेली थेट धमकीच असल्याची टीका त्यांनी केली.
“मी आवाज उठवल्यावर मला लक्ष्य केले गेले”
गेल्या काही दिवसांत घडलेल्या घटनांचा आढावा घेताना आमदार राणे म्हणाले,
“मालवणमध्ये मला काहीतरी चुकीचं घडत आहे असं जाणवलं म्हणून मी आवाज उठवला. माझ्याकडे असलेल्या पुराव्यांसह मी बोलत आहे. पुढे माझ्याबाबत काय होईल हेही मला ठाऊक आहे, पण भिजलेला माणूस पावसाला घाबरत नाही.”
त्यांनी चव्हाणांवर सरळ बोट ठेवत पुन्हा एकदा तीव्र टीका केली.
केनवडेकर यांच्या आरोपांना थेट प्रत्युत्तर
केनवडेकर यांनी केलेल्या आरोपांचे खंडन करत राणे म्हणाले,
“मी परवानगी घेऊन त्यांच्या घरात गेलो. आक्षेप असता तर दरवाजा उघडताच थांबवलं असतं. ते मला स्वतः बसायला सांगत होते. क्राईम सीन पकडून देणे हा गुन्हा नाही. केलेल्या गुन्ह्याची माफी मागण्याऐवजी आरोप करणाऱ्यांनी लाज बाळगली पाहिजे.”
हा विषय बाजूला नेण्याचा प्रयत्न सुरू असून, “तो मी होऊ देणार नाही”, असेही त्यांनी स्पष्ट केले.
नितेश राणेंच्या ‘हमाम…’ वक्तव्यावर भाष्य टाळले
नितेश राणे यांनी केलेल्या विधानावर प्रतिक्रिया देताना राणे म्हणाले,
“हे तर उर्दू आहे. मी पक्षाचं काम करतो आणि करत राहणार.”
उदय सामंतांच्या दौऱ्याचे उदाहरण देत प्रतिप्रश्न
नितेश राणे यांच्या ‘सांताक्लॉज’ उपमेला उत्तर देताना त्यांनी विचारले,
“उदय सामंत येऊन गेले त्याच्या दुसऱ्या दिवशीच तुम्ही आरोप करताय. मग त्याच दिवशी का बोललात नाही?”
सत्ता, यंत्रणा, तपास यांचे सर्व अधिकार संबंधितांकडे असताना आत्ताच प्रश्न उपस्थित का, असा प्रश्न त्यांनी विचारला.
शिल्पा खोत यांच्या जातीच्या दाखल्यावरून निवडणूक वाद
भाजप नगराध्यक्ष पदाच्या उमेदवार शिल्पा खोत यांच्या जातीच्या दाखल्यावर त्यांनी कोर्टात दाखल केलेल्या याचिकेवर बोलताना राणे म्हणाले,
“काल कोर्टाची पहिली तारीख होती, समोरच्या बाजूने साधा वकीलही पाठवला नाही. हे न्यायव्यवस्थेवर विश्वास दाखवणारे वर्तन आहे का? फॉर्म रद्द होणार हे माहीत असल्यामुळेच वकील पाठवला नाही.”
“गरीबांची निवडणूक विरुद्ध श्रीमंतांची निवडणूक”
भ्रष्टाचारविरहित निवडणुकांबाबत विचारलेल्या प्रश्नावर ते म्हणाले,
“मी जे नाकासमोर दिसतं ते करतो. माझे गरीब कार्यकर्ते कष्टाने निवडणूक लढवतात आणि दुसरीकडे श्रीमंतांचे खेळ सुरु असतात. मला यातून काही मिळवायचं नाही. बदलाची सुरुवात चांगली होत असेल तर मला समाधान आहे. महाराष्ट्रात हे थांबेल असं वाटत नाही, पण माझा खारीचा वाटा नक्की असेल.”
मालवण नगरपालिका निवडणूक जसजशी जवळ येत आहे तसतसे आरोप–प्रत्यारोप, प्रतिवाद, राजकीय तणाव उच्चांक गाठत असून राणे–चव्हाण यांच्यातील तणाव प्रदेश राजकारणाचे केंद्रबिंदू बनले आहे.
