सावंतवाडीमध्ये झालेल्या पत्रकार परिषदेत पालकमंत्री नितेश राणे यांनी शिवसेना (शिंदे गट) नेता दीपक केसरकर यांच्यावर तसेच विरोधकांवर जोरदार टीकास्त्र सोडले. या पत्रकार परिषदेला युवराज लखमराजे भोसले, बबन साळगावकर, सुधीर आडीवडेकर आणि मंदार कल्याणकर उपस्थित होते.
राणेंनी सुरुवातीपासूनच विकासाचा मुद्दा अग्रस्थानी ठेवत, “आम्ही बोलतोय विकासाबद्दल, तर विरोधक अडकलेत आरोप–प्रत्यारोपात. जिल्ह्याचं वातावरण ते खराब करत आहेत; पण आम्ही विकासाच्या अजेंड्यावर शांत वातावरण टिकवून ठेवले आहे,” असे सांगितले.
🔹 निलेश राणे बळीचा बकरा?
शिवसेनेतील अंतर्गत राजकारणावर बोलताना नितेश राणेंनी मोठा आरोप केला—
“शिवसेनेत आमदार निलेश राणेंना बळीचा बकरा बनवलं जात आहे. रविंद्र चव्हाणांवर एकही सेनापती बोलत नाही. उदय सामंत का गप्प? दीपक केसरकर का शांत?” असा सवाल त्यांनी उपस्थित केला.
🔹 दीपक केसरकरांवर थेट हल्ला
राणेंनी केसरकरांच्या आजारपणाच्या कारणांवर शंका व्यक्त करताना म्हटलं—
“आजारपण आणि निवडणुकीचा काय संबंध? आजारपणाच्या नावाखाली केसरकर राजकारण करत आहेत.”
तसेच सावंतवाडी–वेंगुर्लेच्या आरोग्यव्यवस्थेवर सातत्याने होत असलेल्या अडचणींवर स्थानिक आमदारांनी काहीच उपाय केले नाहीत, अशी टीकाही त्यांनी केली.
🔹 केसरकरांनी राणेंना राजकारणातून संपवायचा प्रयत्न केला?
नितेश राणेंनी गंभीर आरोप करत म्हटलं—
“२०१४ ते २४ या काळात नारायण राणेंच अस्तित्व संपवण्याचा प्रयत्न दीपक केसरकरांनीच केला. निलेश राणेंनाही संपवण्यासाठी कट रचला होता. उलट भाजपने आम्हाला सर्वकाही दिलं.”
🔹 राजघराण्याचा मुद्दा पुन्हा ऐरणीवर
“सावंतवाडीचं राजघराणं म्हणजे या भूमीचा स्वाभिमान आहे. त्यांचा अपमान करण्याचा प्रयत्न दीपक केसरकरांनी केला. सावंतवाडीकर याला उत्तर मतपेटीतून देतील,” असा विश्वास त्यांनी व्यक्त केला.
🔹 शिंदे गटावर नवा प्रश्न
कणकवलीतील प्रचारात उपमुख्यमंत्री एकनाथ शिंदे दिसत नाहीत, यावर खोचक सवाल करत राणेंनी विचारलं—
“ते फक्त तीनच जागांवर सभा घेत आहेत. जिल्ह्यात ठाकरे गटाचे संदेश पारकर यांच्या प्रचाराला जाणार आहेत का?”
🔹 “जिल्ह्यात कमळच फुलणार”
शेवटी विकासाच्या मुद्द्यावरच जनमत तयार होत असल्याचा दावा करत नितेश राणे म्हणाले—
“जिल्ह्यातील चारही ठिकाणी कमळ फुलणार. मतदार विकासालाच पसंती देतील,” असा ठाम विश्वास त्यांनी व्यक्त केला.
