Malvan Municipal President Mamta Varadkar demanded additional dialysis machines and technicians at Malvan Rural Hospital due to increasing patient waiting lists and inadequate facilities.
मालवण (प्रतिनिधी):
मालवण ग्रामीण रुग्णालयात डायलिसीस मशीन आणि टेक्निशियन अपुरे असल्याने रुग्णांची प्रतीक्षा यादी वाढत असून अनेकांना डायलिसीससाठी ओरोस येथे जावे लागत आहे. त्यामुळे रुग्णालयात अतिरिक्त डायलिसीस मशीन व प्रशिक्षित टेक्निशियन उपलब्ध करून द्यावेत, अशी मागणी मालवणच्या नगराध्यक्ष सौ. ममता वराडकर यांनी वैद्यकीय अधिकारी डॉ. बालाजी पाटील यांच्याकडे केली.
नगराध्यक्ष सौ. वराडकर, उपनगराध्यक्ष दीपक पाटकर, आरोग्य व स्वच्छता सभापती सौ. पूनम चव्हाण आणि महिला व बालकल्याण उपसभापती सौ. अश्विनी कांदळकर यांनी मालवण ग्रामीण रुग्णालयाला भेट देऊन डायलिसीस सुविधेबाबत सविस्तर चर्चा केली. तसेच रुग्णालयातील इतर विभागांची पाहणी करून आवश्यक सुविधा, कर्मचारी कमतरता आणि समस्या जाणून घेतल्या.
रुग्णालय प्रशासनाकडून देण्यात आलेल्या माहितीनुसार, सध्या रुग्णालयात दोन डायलिसीस मशीन कार्यरत असून एक टेक्निशियन व दोन परिचारिका कार्यरत आहेत. दररोज दोन सत्रांमध्ये चार रुग्णांचे डायलिसीस केले जाते. सध्या १२ रुग्ण उपचार घेत असून सहा रुग्ण प्रतीक्षेत आहेत.
यावर नगराध्यक्ष सौ. वराडकर यांनी प्रतीक्षेत असलेल्या रुग्णांची गैरसोय लक्षात घेता आणखी दोन डायलिसीस मशीन बसवावीत तसेच आवश्यक टेक्निशियनची नियुक्ती करावी, अशी मागणी केली. डॉ. पाटील यांनी याबाबत वरिष्ठ स्तरावर पाठपुरावा सुरू असल्याची माहिती दिली. अतिरिक्त मशीनसाठी रुग्णालयाकडून अधिकृत मागणीपत्र देण्याची विनंती करत, आमदार निलेश राणे यांचे लक्ष वेधून आवश्यक सुविधा उपलब्ध करून देण्यासाठी प्रयत्न करू, असे आश्वासन नगराध्यक्षांनी दिले.
यावेळी रुग्णालयातील इतर समस्यांवरही चर्चा झाली. गरोदर महिलांच्या तपासणीसाठी आवश्यक असलेली सोनोग्राफी सेवा सध्या बंद असल्याचे निदर्शनास आले. तसेच स्त्रीरोगतज्ञ व इतर तज्ज्ञ डॉक्टर तसेच कर्मचाऱ्यांची कमतरता असल्याने आवश्यक मनुष्यबळ उपलब्ध करून देण्याची मागणी करण्यात आली. या सर्व बाबींबाबतही आमदारांकडे पाठपुरावा करून रुग्णालयास आवश्यक ते सहकार्य करण्यात येईल, असे नगराध्यक्ष सौ. वराडकर व पदाधिकाऱ्यांनी स्पष्ट केले.
डायलिसीस ही किडनी निकामी झालेल्या रुग्णांसाठी जीवनावश्यक उपचार पद्धती असून हा उपचार आठवड्यातून दोन ते तीन वेळा नियमित करावा लागतो. मालवण ग्रामीण रुग्णालयात सध्या उपलब्ध असलेल्या मर्यादित मशीन आणि अपुऱ्या टेक्निशियनमुळे रुग्णांची प्रतीक्षा यादी वाढत आहे. त्यामुळे काही रुग्णांना उपचारासाठी दूरवर जावे लागत असून त्यांचा वेळ, खर्च आणि शारीरिक त्रास वाढतो. तसेच आपत्कालीन परिस्थितीत तातडीने डायलिसीस उपलब्ध न झाल्यास रुग्णाच्या जीवाला धोका निर्माण होऊ शकतो. त्यामुळे वाढती रुग्णसंख्या लक्षात घेता अधिक डायलिसीस मशीन व प्रशिक्षित टेक्निशियन उपलब्ध करणे अत्यावश्यक ठरत आहे.
