नवी दिल्ली : नीट (NEET) पेपरफुटी प्रकरण आणि विद्यार्थ्यांच्या आंदोलनावर झालेल्या पोलिस कारवाईवरून काँग्रेस नेते तथा लोकसभेतील विरोधी पक्षनेते राहुल गांधी यांनी केंद्र सरकारवर जोरदार निशाणा साधला आहे. शिक्षणमंत्री धर्मेंद्र प्रधान यांनी नैतिक जबाबदारी स्वीकारून तात्काळ राजीनामा द्यावा, अशी मागणी करत त्यांनी विद्यार्थ्यांवरील लाठीचार्जप्रकरणी सरकारला धारेवर धरले.
दिल्लीत नीट पेपरफुटीच्या निषेधार्थ आंदोलन करणाऱ्या विद्यार्थ्यांवर पोलिसांनी लाठीचार्ज आणि अश्रुधुराचा वापर केल्याच्या घटनेचे पडसाद संसदेच्या पावसाळी अधिवेशनातही उमटले. या घटनेच्या निषेधार्थ राहुल गांधींसह विरोधी पक्षाच्या खासदारांनी पंतप्रधान नरेंद्र मोदी यांच्या निवासस्थानाबाहेर आंदोलन केले. त्यानंतर मंगळवारी झालेल्या पत्रकार परिषदेत राहुल गांधी यांनी केंद्र सरकारवर टीकेची झोड उठवली.
राहुल गांधी यांनी देशात गेल्या दहा वर्षांत १५२ पेपरफुटीच्या घटना घडल्याचा आरोप करत, या प्रकरणांमध्ये दोषींवर प्रभावी कारवाई झालेली नसल्याचे म्हटले. शिक्षण व्यवस्था कोलमडल्याचा आरोप करत त्यांनी विद्यार्थ्यांच्या आंदोलनाला काँग्रेसचा पूर्ण पाठिंबा असल्याचे स्पष्ट केले.
राहुल गांधींच्या तीन प्रमुख मागण्या
- शिक्षणमंत्री धर्मेंद्र प्रधान यांची हकालपट्टी : नीटसह विविध परीक्षा व्यवस्थापनात अपयश आल्याने धर्मेंद्र प्रधान यांना तात्काळ पदावरून हटवावे.
- लाठीचार्जची जबाबदारी निश्चित करावी : विद्यार्थ्यांवर लाठीचार्जाचे आदेश कोणी दिले, याची चौकशी करून संबंधितांवर कारवाई करावी.
- विद्यार्थ्यांची माफी मागावी : दिल्लीतील घटनेबाबत पंतप्रधान नरेंद्र मोदी यांनी विद्यार्थ्यांची जाहीर माफी मागावी.
राहुल गांधी यांनी शिक्षण व्यवस्था सर्वसामान्यांच्या आवाक्याबाहेर गेल्याचा आरोपही केला. सरकार शिक्षणावर मोठा खर्च केल्याचा दावा करत असले, तरी विद्यार्थ्यांना महागड्या शिक्षणाचा आणि स्पर्धा परीक्षांच्या वाढत्या खर्चाचा सामना करावा लागत असल्याचे त्यांनी सांगितले. शिक्षणानंतर रोजगाराच्या संधी उपलब्ध करून देणे ही सरकारची प्राथमिक जबाबदारी असल्याचेही त्यांनी नमूद केले.
दरम्यान, नीट पेपरफुटी, विद्यार्थ्यांचे आंदोलन आणि त्यावरील पोलिस कारवाई या मुद्द्यांवरून संसदेतही सत्ताधारी आणि विरोधकांमध्ये जोरदार संघर्ष होण्याची चिन्हे दिसत आहेत.
