भंडारी ए. सो. कनिष्ठ महाविद्यालयाच्या शिरपेचात आणखी एक मानाचा तुरा
मालवण, दि. ५ सप्टेंबर २०२६ : भंडारी ए. सो. कनिष्ठ महाविद्यालय, मालवणच्या क्रीडा क्षेत्रातील यशाची परंपरा कायम राखत इयत्ता बारावी कॉमर्सचा विद्यार्थी देवांग चव्हाण याने उल्लेखनीय कामगिरी केली आहे. जिल्हास्तरीय क्रीडा स्पर्धा २०२६-२७ मधील अंडर-१९ वूशु क्रीडा प्रकारात उत्कृष्ट कामगिरी करत देवांगची विभागस्तरीय स्पर्धेसाठी निवड झाली आहे.
देवगड तालुक्यातील कुणकेश्वर हायस्कूल येथे जिल्हास्तरीय क्रीडा स्पर्धेचे आयोजन करण्यात आले होते. या स्पर्धेत देवांगने जिद्द, मेहनत, आत्मविश्वास आणि उत्कृष्ट क्रीडा कौशल्याच्या जोरावर प्रभावी कामगिरी बजावली. त्याच्या या कामगिरीच्या जोरावर त्याने विभागस्तरीय स्पर्धेतील आपले स्थान निश्चित केले.
देवांगच्या या यशामुळे भंडारी हायस्कूल व कनिष्ठ महाविद्यालय, मालवणच्या क्रीडा क्षेत्रातील यशात आणखी एका मानाच्या तुऱ्याची भर पडली आहे. त्याच्या निवडीबद्दल संस्थेचे सर्व पदाधिकारी, मुख्याध्यापक, शिक्षक तसेच शिक्षकेतर कर्मचारी यांनी देवांगचे अभिनंदन केले असून, विभागस्तरीय स्पर्धेसाठी त्याला मनःपूर्वक शुभेच्छा दिल्या आहेत.
देवांगच्या पुढील स्पर्धेतील कामगिरीकडे मालवणवासीयांचे लक्ष लागले आहे.
