लाल दगडाच्या उत्खननामुळे नैसर्गिक झरे, विहिरी दूषित होत असल्याचा आरोप; खाणीवरील कामगारांच्या उघड्यावर शौचामुळे आरोग्याचा प्रश्न ऐरणीवर
मालवण, दि. प्रतिनिधी :
लाल दगडाच्या उत्खननाने कुडोपी गावातील नैसर्गिक जलस्रोतच धोक्यात आल्याचा गंभीर आरोप ग्रामस्थांनी केला आहे. खाणीतून वाहून येणारे मातीमिश्रित पाणी नैसर्गिक झरे, विहिरी आणि अन्य जलस्रोतांमध्ये मिसळत असल्याने पिण्याचे पाणी दूषित होत असल्याचे ग्रामस्थांचे म्हणणे आहे. त्यातच खाणीवर काम करणारे कामगार उघड्यावर शौचास जात असल्याने पावसाच्या पाण्यासोबत ही घाण जलस्रोतांमध्ये मिसळत असल्याचा आरोप करण्यात आला आहे.
पिण्याचे पाणी दूषित होत असताना प्रशासन नेमके गप्प का? असा संतप्त सवाल उपस्थित करत ग्रामस्थांनी प्रशासनाच्या भूमिकेबाबत तीव्र नाराजी व्यक्त केली आहे. वारंवार निवेदने देऊन तसेच उपोषण करूनही प्रश्नाची दखल घेतली जात नसल्याचा आरोप ग्रामस्थांनी केला आहे. येत्या चार दिवसांत प्रशासनाने प्रत्यक्ष पाहणी करून चौकशी आणि योग्य निर्णय न घेतल्यास उग्र आंदोलन छेडण्यात येईल, असा इशाराही ग्रामस्थांनी दिला आहे.
उत्खननामुळे जलस्रोतांवर संकट?
कुडोपी गाव व परिसरात मोठ्या प्रमाणात लाल दगडाचे उत्खनन सुरू आहे. या उत्खननामुळे परिसरातील नैसर्गिक झरे, विहिरी आणि अन्य जलस्रोतांवर विपरीत परिणाम होत असल्याचे ग्रामस्थांचे म्हणणे आहे. हे नैसर्गिक जलस्रोत अनेक वर्षांपासून गावातील नागरिकांसाठी पाण्याचा महत्त्वाचा आधार आहेत. मात्र उत्खननामुळे या स्रोतांचे पाणी दूषित होत असल्याने नागरिकांच्या आरोग्याचा प्रश्न निर्माण झाल्याचा आरोप करण्यात आला आहे.
खाणीतील मातीमिश्रित पाणी पावसाच्या प्रवाहासोबत जलस्रोतांमध्ये मिसळत असल्याने पिण्याच्या पाण्याची गुणवत्ता खालावत असल्याचे ग्रामस्थांनी सांगितले. दूषित पाण्यामुळे नागरिक सातत्याने आजारी पडत असल्याचा दावाही ग्रामस्थांनी केला आहे.
उघड्यावर शौचाचा गंभीर आरोप
यापेक्षाही गंभीर बाब म्हणजे खाणीवर काम करणारे कामगार उघड्यावर शौचास जात असल्याचा आरोप ग्रामस्थांनी केला आहे. पावसाळ्यात ही घाण पाण्यासोबत वाहून नैसर्गिक झरे आणि विहिरींमध्ये मिसळण्याची शक्यता असल्याने सार्वजनिक आरोग्य धोक्यात येण्याची भीती व्यक्त करण्यात आली आहे.
गावातील पिण्याच्या पाण्याची सुरक्षितता, नागरिकांचे आरोग्य, पर्यावरणाचे संरक्षण आणि नैसर्गिक जलस्रोतांचे संवर्धन या सर्व बाबींची प्रशासनाने गांभीर्याने दखल घ्यावी, अशी मागणी ग्रामस्थांनी केली आहे.
चार दिवसांचा अल्टिमेटम!
प्रशासनाने या प्रकरणाची तातडीने प्रत्यक्ष पाहणी करून जलस्रोतांच्या पाण्याची तपासणी करावी, अशी ग्रामस्थांची मागणी आहे. उत्खननामुळे जलस्रोतांचे नुकसान होत असल्याचे आढळल्यास संबंधित लाल दगडाचे उत्खनन तातडीने थांबवून संबंधितांवर कारवाई करावी, अशी मागणीही करण्यात आली आहे.
चार दिवसांत प्रशासनाकडून ठोस कार्यवाही झाली नाही, तर उग्र आंदोलन छेडण्यात येईल, असा स्पष्ट इशारा ग्रामस्थांनी दिला आहे. त्यामुळे कुडोपीतील लाल दगडाच्या उत्खननाचा प्रश्न आता आंदोलनाच्या उंबरठ्यावर पोहोचला आहे.
यावेळी प्रशांत पडवळ, गुरुप्रसाद मयेकर, हेमंत पडवळ, राजेंद्र हिर्लेकर, बाळकृष्ण पडवळ, विजय वाळवे, दिनानाथ पडवळ, दत्ताराम वाळवे, गणेश वाळवे, शशिकांत वाळवे, नंदकुमार पडवळ, सचिन पडवळ, राजाराम पाटणकर, प्रवीण मुणगेकर, गणपत घाडी, गौरव अपराज, मोहन वाळवे, दिनेश वाळवे, दशरथ वाळवे, अनिल वरक, श्लोक घाडी, संतोष वाळवे, दीपक शेळके, अनिल हिर्लेकर, समीर हिर्लेकर, शंकर हिर्लेकर आदी ग्रामस्थ उपस्थित होते.
