रील बनवून फक्त प्रसिद्धी आणि फॉलोअर्स मिळवण्याचे दिवस आता मागे पडणार आहेत का? तुमच्या एका व्हिडीओला लाखो व्ह्यूज मिळाले, तर त्यातून थेट सरकारी प्रोत्साहनाची कमाई होऊ शकते. सोशल मीडिया कंटेंट क्रिएटर्ससाठी बिहार सरकारने घेतलेल्या एका निर्णयामुळे रीलस्टार आणि डिजिटल क्रिएटर्समध्ये सध्या चर्चेला उधाण आले आहे.
विशेष म्हणजे, व्हिडीओ जितका लोकप्रिय तितकी कमाई वाढण्याची शक्यता आहे. एखाद्या कंटेंटला १० लाख व्ह्यूज मिळाले तर ही रक्कम थेट लाख रुपयांपर्यंत जाऊ शकते. मात्र, ही संधी प्रत्येक रीलस्टारसाठी खुली नाही; त्यासाठी सरकारने काही महत्त्वाच्या अटी आणि नियमही निश्चित केले आहेत. नेमकी ही योजना काय आहे, कोणाला पैसे मिळणार आणि १० लाख व्ह्यूजसाठी सरकार किती रक्कम देणार? जाणून घेऊया…
सोशल मीडिया हे केवळ मनोरंजनाचे माध्यम न राहता उत्पन्नाचे प्रभावी साधन बनले आहे. याच पार्श्वभूमीवर बिहार सरकारने सोशल मीडिया कंटेंट क्रिएटर्ससाठी आकर्षक प्रोत्साहन योजना जाहीर केली आहे. मुख्यमंत्री सम्राट चौधरी यांच्या अध्यक्षतेखाली झालेल्या मंत्रिमंडळाच्या बैठकीत या योजनेला मंजुरी देण्यात आली आहे.
या योजनेनुसार, पात्र कंटेंट क्रिएटरच्या व्हिडीओला मिळणाऱ्या प्रत्येक १ लाख व्ह्यूजसाठी १० हजार रुपये देण्यात येणार आहेत. त्यामुळे एखाद्या व्हिडीओला १० लाख किंवा त्याहून अधिक व्ह्यूज मिळाल्यास क्रिएटरला कमाल १ लाख रुपयांपर्यंत प्रोत्साहन रक्कम मिळू शकते. मात्र, व्ह्यूज कितीही वाढले तरी एका व्हिडीओसाठी १ लाख रुपयांची कमाल मर्यादा कायम राहणार आहे.
कोणत्या प्लॅटफॉर्मचा समावेश?
या योजनेत इन्स्टाग्राम रील्स, यूट्यूब शॉर्ट्स आणि व्हिडीओ, फेसबुक तसेच एक्स यांसारख्या सार्वजनिक सोशल मीडिया प्लॅटफॉर्मचा समावेश करण्यात आला आहे.
मात्र, केवळ व्हिडीओ व्हायरल झाला म्हणून पैसे मिळणार नाहीत. संबंधित क्रिएटर, पेज किंवा कंपनीची बिहार सरकारच्या माहिती व जनसंपर्क विभागाकडे (IPRD) अधिकृत नोंदणी किंवा पॅनेलवर समावेश असणे आवश्यक आहे.
सरकारी कामांवर कंटेंट तयार करावा लागणार
या योजनेचा मुख्य उद्देश सरकारी कामे, विकास प्रकल्प आणि कल्याणकारी योजनांची माहिती सोशल मीडियाच्या माध्यमातून नागरिकांपर्यंत पोहोचवणे हा आहे. त्यामुळे पात्र ठरणाऱ्या कंटेंटमध्ये सरकारी योजना, पायाभूत सुविधा, सार्वजनिक कामगिरी किंवा विकासकामांवर आधारित माहिती असणे अपेक्षित आहे.
व्ह्यूजची तपासणी कशी होणार?
व्हिडीओ अपलोड केल्यानंतर लगेच व्ह्यूजची मोजणी केली जाणार नाही. व्हिडीओ लाइव्ह झाल्यानंतर ३० दिवसांनी व्ह्यूजची अधिकृत मोजणी आणि पडताळणी केली जाणार आहे.
बनावट व्ह्यूज, बॉट्स किंवा कृत्रिम पद्धतीने वाढवलेली पोहोच रोखण्यासाठी खात्याची सत्यता, फॉलोअर्स आणि प्लॅटफॉर्म अॅनालिटिक्सची तपासणी केली जाईल. पडताळणी पूर्ण झाल्यानंतर पात्र क्रिएटरला रक्कम थेट बँक खात्यात हस्तांतरित केली जाणार आहे.
सविस्तर नियम लवकरच
योजनेतील पात्रता, कंटेंटची निकष, नोंदणी प्रक्रिया आणि पेमेंटची सविस्तर नियमावली बिहार सरकारच्या माहिती व जनसंपर्क विभागाकडून स्वतंत्र अधिसूचनेद्वारे जाहीर केली जाणार आहे.
म्हणजेच, ‘कंटेंट तयार करा, व्ह्यूज मिळवा आणि कमाई करा’ अशी संधी बिहारमधील सोशल मीडिया क्रिएटर्सना मिळणार आहे. मात्र सरकारी योजनांवर आधारित कंटेंट करताना माहिती अचूक, सत्य आणि सरकारी निकषांनुसार असणे महत्त्वाचे ठरणार आहे.
फॅक्ट चेक – २० ऑगस्ट २०२६ रोजी बिहार मंत्रिमंडळाने Bihar Social Media and Other Online Media Rules, 2026 मध्ये बदल मंजूर केल्याचे अनेक विश्वसनीय वृत्तस्रोतांनी नोंदवले आहे.
