मालवण, प्रतिनिधी :
ग्रामीण भागातील विद्यार्थ्यांनी केवळ अभियांत्रिकी किंवा वैद्यकीय शिक्षणालाच करिअरचे अंतिम ध्येय न मानता संशोधनाधिष्ठित विज्ञान क्षेत्रातील संधींचाही विचार करावा, असा प्रेरणादायी संदेश देणारे उल्लेखनीय यश मालवण तालुक्यातील श्री रेकोबा माध्यमिक विद्यालय, वायरी-भूतनाथ येथील माजी विद्यार्थिनी कु. श्रावणी प्रवीण कुबल हिने संपादन केले आहे. देशातील प्रतिष्ठित IIT (BHU), वाराणसी येथे Master of Pharmacy (M.Pharm.) – Pharmaceutical Chemistry या पदव्युत्तर अभ्यासक्रमासाठी तिची निवड झाली आहे.
श्रावणीने दहावीपर्यंतचे शिक्षण श्री रेकोबा माध्यमिक विद्यालय, वायरी-भूतनाथ येथे पूर्ण केले. शालेय जीवनापासूनच औषधनिर्मिती क्षेत्रात करिअर करण्याचा निर्धार करून तिने पुढील शिक्षणासाठी शासकीय औषधनिर्माणशास्त्र महाविद्यालय, रत्नागिरी येथे प्रवेश घेतला. तेथून तिने बी. फार्म. (B.Pharm.) ही पदवी प्रथम श्रेणी विशेष प्राविण्यासह संपादन केली. उच्च शिक्षणाची जिद्द, सातत्यपूर्ण अभ्यास आणि कठोर परिश्रम यांच्या बळावर तिने हे यश मिळविले आहे.
IIT (BHU), वाराणसी येथे एम. फार्म. अभ्यासक्रमासाठी देशभरातून अत्यंत गुणवंत आणि मर्यादित विद्यार्थ्यांचीच निवड केली जाते. त्यामुळे श्रावणीची निवड ही केवळ तिच्यासाठीच नव्हे, तर मालवण तालुका आणि सिंधुदुर्ग जिल्ह्यासाठीही अभिमानाची बाब मानली जात आहे.
तिने निवडलेले Pharmaceutical Chemistry हे औषधांचे संशोधन, नवीन औषधांचा शोध, औषधांची गुणवत्ता व सुरक्षितता, औषधनिर्मिती, जैवतंत्रज्ञान, संशोधन प्रयोगशाळा तसेच राष्ट्रीय आणि आंतरराष्ट्रीय औषध उद्योगात करिअर घडविणारे अत्यंत महत्त्वाचे क्षेत्र आहे. भारतासह जगभरात आरोग्य व संशोधन क्षेत्राचा झपाट्याने विस्तार होत असल्याने या शाखेतील तज्ज्ञांना मोठी मागणी निर्माण होत आहे.
आजच्या स्पर्धात्मक युगात करिअरच्या अनेक नव्या वाटा विद्यार्थ्यांसाठी खुल्या आहेत. योग्य मार्गदर्शन, सातत्यपूर्ण अभ्यास आणि मेहनतीच्या जोरावर कोणत्याही क्षेत्रात यश संपादन करता येते, याचे श्रावणी कुबल हिचे यश हे प्रेरणादायी उदाहरण ठरले आहे. विशेषतः ग्रामीण भागातील विद्यार्थ्यांसाठी हे यश नवी दिशा दाखविणारे आहे.
कु. श्रावणी प्रवीण कुबल हिच्या या उल्लेखनीय यशाबद्दल श्री रेकोबा माध्यमिक विद्यालयाचे अध्यक्ष, व्यवस्थापन मंडळ, मुख्याध्यापक संजय खोचरे, शिक्षकवृंद, शिक्षकेतर कर्मचारी, विद्यार्थी तसेच पालकांनी तिचे अभिनंदन करून पुढील शैक्षणिक व संशोधनात्मक वाटचालीसाठी मनःपूर्वक शुभेच्छा दिल्या आहेत.
 वाराणसीमध्ये एम. फार्म.साठी निवड; संशोधन क्षेत्रातील यशाने ग्रामीण विद्यार्थ्यांसमोर नवा आदर्श){kind=link}