मालवण, प्रतिनिधी :
मालवण बंदर जेट्टी ते ऐतिहासिक सिंधुदुर्ग किल्ला या जलमार्गावर प्रवासी वाहतूक सेवा सुरू करण्याच्या महत्त्वाकांक्षी प्रकल्पाच्या उद्देशपत्र (लेटर ऑफ इंटेंट) वितरण समारंभाचे आयोजन शुक्रवार, दि. ३१ जुलै रोजी दुपारी २ वाजता देवबाग भवन, मालवण येथे करण्यात आले आहे.
या समारंभाला माजी मुख्यमंत्री तथा माजी केंद्रीय मंत्री खासदार नारायण राणे, मत्स्यव्यवसाय व बंदर विकास मंत्री तथा सिंधुदुर्ग जिल्ह्याचे पालकमंत्री नितेश राणे तसेच कुडाळ-मालवण विधानसभा मतदारसंघाचे आमदार निलेश राणे प्रमुख उपस्थित राहणार आहेत.
या प्रकल्पाच्या माध्यमातून मालवण बंदर जेट्टी ते सिंधुदुर्ग किल्ला या जलमार्गावर नियमित प्रवासी वाहतूक सुरू करण्याच्या दिशेने महत्त्वपूर्ण पाऊल उचलले जाणार आहे. या सेवेमुळे सिंधुदुर्ग किल्ल्यावर जाणाऱ्या पर्यटकांना सुरक्षित, जलद आणि सुलभ जलप्रवासाची सुविधा उपलब्ध होणार असून, मालवणच्या पर्यटन विकासाला नवी चालना मिळेल, अशी अपेक्षा व्यक्त केली जात आहे. स्थानिक नागरिकांनाही या सेवेचा लाभ होणार असल्याचे सांगण्यात आले.
या कार्यक्रमाचे आयोजन मालवण नगरपरिषदेच्या वतीने करण्यात आले असून, नगराध्यक्षा ममता वराडकर, उपनगराध्यक्ष दीपक पाटकर तसेच महायुतीचे नगरसेवक, पदाधिकारी आणि कार्यकर्त्यांनी नागरिकांनी मोठ्या संख्येने उपस्थित राहून कार्यक्रम यशस्वी करावा, असे आवाहन केले आहे.
