मालवण नगरपरिषद निवडणुकीत प्रभाग क्रमांक तीनमध्ये उबाठा शिवसेनेचे तरुण व गतिमान उमेदवार उमेश अरविंद चव्हाण यांनी प्रचाराला वेग दिला असून प्रभागात उत्साहवर्धक वातावरण निर्माण झाले आहे. स्थानिक उमेदवार म्हणून प्रभागातील प्रत्येक समस्या, अडचणी आणि नागरिकांच्या अपेक्षा जाणणारा उमेदवार अशी त्यांची ओळख आहे.
देऊळवाडा परिसराचा समावेश असलेल्या या प्रभागातून शिवसेनेने उमेश चव्हाण यांच्यावर विश्वास टाकत उमेदवारी दिली आहे. चव्हाण यांचा प्रभागात चांगला लोकसंपर्क असून विशेषतः युवकांमध्ये त्यांची लोकप्रियता अधिक आहे. व्यावसायिक आयुष्यातही त्यांनी एक उत्तम आंबा व्यावसायिक म्हणून वेगळी छाप निर्माण केली आहे. गेल्या अनेक वर्षांपासून ते शिवसेनेतील युवासेनेच्या माध्यमातून संघटनात्मक कामात सक्रिय असून स्थानिक प्रश्नांवर सातत्याने आवाज उठविणारे कार्यकर्ते म्हणून ते ओळखले जातात.
प्रभागातील वाहतूक, सांडपाणी, रस्ते, स्वच्छता, पाणीपुरवठा अशा मूलभूत प्रश्नांवर उपाययोजना राबविण्यासोबतच परिसराच्या सर्वांगीण विकासासाठी आपण कटिबद्ध असल्याचे चव्हाण यांनी सांगितले. “स्थानिक समस्यांची जाण असलेला तरुण, सुशिक्षित आणि कार्यक्षम उमेदवार म्हणून मतदारांनी माझ्यावर विश्वास टाकावा. नगरसेवक म्हणून संधी दिल्यास प्रभागाच्या सर्वांगीण विकासासाठी अखंडपणे काम करेन,” असे ते म्हणाले.
नगराध्यक्ष पदाच्या उमेदवार सौ. पूजा करलकर व उबाठा शिवसेनेच्या महिला उमेदवार सौ. योगिता गांवकर यांच्या सोबत उमेश चव्हाण घराघरांत जाऊन गाठीभेटी घेत आहेत. मतदारांकडून मिळणारा उत्स्फूर्त प्रतिसाद पाहता या प्रभागात उबाठा शिवसेनेचा प्रचार चांगला जोर पकडल्याचे चित्र दिसत आहे.
उमेश चव्हाण यांच्या उमदे व्यक्तिमत्त्वामुळे आणि सक्रिय कार्यशैलीमुळे प्रभाग तीनमध्ये ही निवडणूक अधिकच रंगतदार बनली आहे.
