सर्वसामान्य नागरिक हा विकासाचा केंद्रबिंदू मानून केंद्र आणि राज्य शासनाकडून राबविण्यात येणाऱ्या विविध योजनांचा लाभ खऱ्या अर्थाने तळागाळापर्यंत पोहोचवण्यासाठी स्थानिक स्वायत्त संस्थांमध्येही भाजपची सत्ता आवश्यक असल्याची जाणीव आता मतदारांना होत असल्याचे चित्र उमटत आहे. गेल्या आठ दिवसांपासून घरोघरी जाऊन झालेल्या प्रचारात मतदारांकडून मिळालेल्या उत्स्फूर्त प्रतिसादामुळे आपला विजय निश्चित असल्याचा दावा मालवण प्रभाग दोन मधील भाजप उमेदवार ललित हरी चव्हाण आणि सौ. अमृता अनिकेत फाटक यांनी केला आहे.
प्रभाग दोनमध्ये भाजपने युवा उमेदवारांना संधी देत तरुण मतदारांवर प्रभावी पकड साधली आहे. ललित चव्हाण यांनी गेल्या पाच वर्षांतील जनसेवा, प्रभागातील उपस्थिती आणि समस्यांवर केलेली कामगिरी यामुळे त्यांना ठोस जनाधार मिळत आहे. तर अमृता फाटक या उच्च शिक्षित असून सामाजिक कार्याचा वारसा लाभलेल्या असल्याने महिलांमध्ये त्यांच्याबद्दल सकारात्मकता निर्माण झाली आहे. दोन्ही उमेदवारांच्या प्रचारात कार्यकर्त्यांची मोठी गर्दी, पक्षाची मजबूत संघटना आणि वयोवृद्धांपासून युवकांपर्यंतचा पाठिंबा स्पष्ट दिसत आहे.
भाजपकडून प्रभागात विकासाचा मुद्दा ठळकपणे पुढे केला जात असून पंतप्रधान नरेंद्र मोदी आणि मुख्यमंत्री देवेंद्र फडणवीस यांनी राबविलेल्या योजनांची माहिती मतदारांपर्यंत पोहोचवली जात आहे. विशेषतः मोफत धान्य योजनेचा थेट लाभ नागरिकांना मिळत असल्याने समाधानाचे सूर ऐकू येत आहेत. शासनाने घेतलेल्या महत्वाकांक्षी निर्णयांमुळे सर्वसामान्यांचे जीवनमान उंचावत असल्याचा विश्वासही मतदार व्यक्त करीत आहेत.
ललित चव्हाण हे महाविद्यालयीन जीवनापासूनच शैक्षणिक आणि सांस्कृतिक उपक्रमात सक्रिय असल्यामुळे त्यांची प्रभागात उत्तम ओळख निर्माण झाली आहे. मनमिळावू स्वभाव, स्नेहपूर्ण वर्तणूक आणि सर्वांसाठी उपलब्धता या गुणांमुळे त्यांना व्यापक समर्थन मिळत आहे. अमृता फाटक यांचाही सभ्य, आदरयुक्त संवाद आणि महिलांमधील संपर्क यामुळे त्यांना चांगला प्रतिसाद मिळत असल्याचे दिसते.
याशिवाय प्रभाग दोनमधील मतदारांनी भाजपच्या नगराध्यक्ष पदाच्या उमेदवार सौ. शिल्पा खोत यांना मोठ्या मताधिक्याने विजयी करण्याचा निर्धार व्यक्त केला असल्याचा दावा चव्हाण व फाटक यांनी केला. प्रभागातील जनतेला विकासाची गती कायम ठेवण्यासाठी आणि नवीन सुविधा निर्माण करण्यासाठी भाजपची जोडीच योग्य असल्याचा विश्वासही त्यांनी व्यक्त केला.
प्रचाराच्या या जोरदार लाटेमुळे प्रभाग दोनमध्ये भाजपची आघाडी स्पष्ट दिसत असल्याचे स्थानिक राजकीय वर्तुळात चर्चेला आहे.
