शहर विकास आघाडी, युतीचा गोंधळ, प्रचारात दिसत-नसलेली चेहरे आणि मागच्या दारातून खेळले जाणारे राजकीय डावपेच—या सर्व राजकीय वातावरणात राज्याचे मंत्री नितेश राणे यांनी आज एक जोरदार राजकीय स्फोट केला. “निलेश राणे यांना जाणीवपूर्वक एकटं पाडलं जात आहे, त्यांना बळीचा बकरा बनवण्याचा प्रयत्न सुरू आहे,” असा थेट आरोप करत त्यांनी आपल्या भावाची ठामपणे पाठराखण केली.
पत्रकार परिषदेत बोलताना नितेश राणे म्हणाले—
“शिवसेनेतून निलेश राणे यांच्या समर्थनार्थ एकही नेता का बोलत नाही?”
- “उदय सामंत येऊन रवींद्र चव्हाणांवर टीका करत नाहीत, का?
- गुलाबराव पाटील राणे साहेबांची खिल्ली उडवतात… त्या वेळी कोणी बोलत नाही.”
- “निलेश राणेच एकटे का लढत आहेत? कोकणातला, रत्नागिरीचा की महाराष्ट्रातील एकही नेता त्यांच्या बाजूने का बोलत नाही?”
या प्रश्नांनी त्यांनी शिवसेनेच्या नेतृत्वालाच धारेवर धरलं.
केसरकरांच्या दाव्यांना थेट प्रत्युत्तर
दीपक केसरकर यांनी केलेल्या विधानांवर नितेश राणेंनी सविस्तर प्रतिउत्तर दिलं.
केसरकर म्हणाले होते की—
“नारायण राणे यांचा शब्द मानला गेला नाही, त्यांना संपवण्याचा कट सुरू आहे.”
यावर नितेश राणे म्हणाले :
- “नारायण राणे यांना युती कशी होते हे कोणी शिकवायची गरज नाही. ते मुख्यमंत्री राहिलेले प्रगल्भ नेते आहेत.”
- “रत्नागिरीला युती झाली, सिंधुदुर्गात झाली नाही—हे निर्णय टेबलावर झाले. त्यांची पूर्ण माहिती राणे साहेबांकडे असते.”
- “रवींद्र चव्हाण आणि देवेंद्र फडणवीस यांच्यासोबत राणे साहेबांचा अगदी उत्तम संवाद आहे.”
“विकासावर बोलायला मुद्दा नसल्याने आरोपांची धडाधड”
नितेश राणे पुढे म्हणाले :
- “२०१९ पासून मल्टीस्पेशालिटी हॉस्पिटलची जागा क्लियर आहे. तरीही ती भरून देणं केसरकरांना जमलं नाही.”
- “सावंतवाडी–वेंगुर्लेचे लोक आजही गोव्याला उपचारासाठी जातात. डॉक्टर, आरोग्यव्यवस्था, रुग्णालय—काहीच का केलं नाही?”
- “विकासाचा एकही मुद्दा नसल्यानेच केवळ आरोप केले जात आहेत.”
“रवींद्र चव्हाण यांच्या कामावर टीका?—अगदीच अन्यायकारक!”
नितेश राणेंनी स्पष्ट सांगितलं—
- “रवींद्र चव्हाण यांनी लोकसभा आणि विधानसभा निवडणुकांमध्ये आमच्यासाठी काय काम केलं, हे आम्हाला चांगलं माहिती आहे.”
- “त्यांच्यावर टीका करणे म्हणजे विकासात अडथळे निर्माण करण्याचा प्रयत्न.”
“२ तारखेनंतर बसून मार्ग काढू—महायुती टिकणारच”
नितेश राणे म्हणाले—
- “निलेश राणे यांनी जे म्हटलं, त्यानुसार २ तारखेनंतर फडणवीस आणि रवींद्र चव्हाण यांच्यासोबत बसून महायुतीतील गैरसमज बाजूला करून मार्ग काढू.”
- “राजकारण संपल्यानंतरही आम्ही विकासासाठी एकत्र काम करणार आहोत.”
खऱ्या अर्थाने राजकीय ताप वाढवणारी टिप्पणी
या पत्रकार परिषदेनंतर जिल्ह्यातील राजकीय समीकरणांवर एकच चर्चा—
“निलेश राणेंना खरोखर एकटे पाडले जात आहे का?”
“शिवसेनेतून त्यांच्यासाठी कोणी पुढे का येत नाही?”
“युतीचा गोंधळ कोणामुळे झाला?”
नितेश राणेंच्या आरोपांनी आणि सवालांनी निवडणुकीच्या शेवटच्या टप्प्यात सिंधुदुर्गातील राजकीय वातावरण तापलं आहे.
आता २ डिसेंबरच्या मतदानानंतर कोणत्या दिशेने राज्यातील महायुतीचे समीकरण झुकते, हे पाहणं उत्सुकतेचं ठरेल.
