मालवण तालुक्यातील दांडी येथील श्री देव दांडेश्वर मंदिराचा वार्षिक जत्रोत्सव शनिवार, दि. ११ जानेवारी रोजी भक्तिमय वातावरणात संपन्न होणार आहे. या जत्रोत्सवानिमित्त दिवसभर विविध धार्मिक कार्यक्रमांचे आयोजन करण्यात आले आहे.
सकाळी पारंपरिक पद्धतीने पूजा-अर्चा करण्यात येणार असून, सायंकाळी ४ वाजल्यापासून विविध धार्मिक विधी संपन्न होतील. रात्री भाविकांच्या मनोरंजनासाठी व धार्मिक संस्कृतीचे दर्शन घडवणारा दशावतार नाट्यप्रयोग आयोजित करण्यात आला आहे.
या जत्रोत्सवाच्या निमित्ताने परिसरातील तसेच बाहेरील भाविक मोठ्या संख्येने उपस्थित राहतात. त्यामुळे सर्व भाविकांनी या पवित्र जत्रोत्सवास उपस्थित राहून श्री देव दांडेश्वराचे दर्शन घेऊन धार्मिक लाभ घ्यावा, असे आवाहन दांडी गाव कमिटी व दांडी ग्रामस्थांच्या वतीने करण्यात आले आहे.
