मालवण येथे शिवसेनेतर्फे आयोजित विराट जाहीर सभेत उपमुख्यमंत्री एकनाथ शिंदे यांनी जोरदार भाषण करत मालवण शिवसेनेचा अभेद्य किल्ला असल्याचा पुनरुच्चार केला. शिवसेनेच्या नगराध्यक्ष पदाच्या उमेदवार ममता वराडकर यांना प्रचंड बहुमताने विजयी करून मालवणात विकासाचा नवा टप्पा सुरू करावा, असे आवाहन त्यांनी नागरिकांना केले.
“कोकण शिवसेनेचा कायमचा गड; विरोधकांचे दशावतार सुरू”
उपमुख्यमंत्री शिंदे यांनी विरोधकांवर तीव्र टीका करताना म्हटले की,
“कोकण हा शिवसेनेचा गड आहे. येथील लोकांचा विश्वास आजही शिवसेनेवरच आहे. विरोधकांनी कामे न केल्यामुळे त्यांचे दशावतार सुरू झाले आहेत.”
यावेळी आमदार निलेश राणे यांचा उल्लेख करत शिंदे म्हणाले,
“निलेश राणे हे खरे शिवसैनिक आहेत. जनतेसाठी योग्य काम करताना त्यांनी कुणाचीही भीती बाळगू नये. त्यांच्या पाठीशी संपूर्ण शिवसेना ठामपणे उभी आहे.”
महिलांसाठी लखपती योजनेचा संदेश
राज्यात महिलांच्या सक्षमीकरणासाठी सुरू असलेल्या मुख्यमंत्री माझी लाडकी बहिण योजना ही फक्त आर्थिक पाठबळापुरती न राहता महिलांना आत्मनिर्भर बनवण्याचा सरकारचा प्रयत्न असल्याचे त्यांनी सांगितले.
“फक्त १५०० रुपये देऊन स्वस्थ बसायचे नाही; महिलांना लखपती बनवण्याचे आमचे ध्येय आहे,” असे शिंदे यांनी स्पष्ट केले.
शहरी भागातील महिला बचत गटांना मोठ्या भांडवलाची सुविधा देण्यासाठी नगरविकास विभागामार्फत लवकरच महत्त्वाचे निर्णय घेतले जाणार असल्याचेही त्यांनी जाहीर केले.
मालवणचा कायापालट करण्याचे आश्वासन
मालवणातील पर्यटन, पायाभूत सुविधा आणि नागरिकांच्या गरजा लक्षात घेऊन मोठ्या प्रमाणात विकासकामे करण्याची तयारी असल्याचे उपमुख्यमंत्र्यांनी सांगितले.
“निलेश राणे प्रस्ताव देतील, तेव्हा पाणीपुरवठा, भुयारी गटार, गार्डन, खेळाची मैदाने, नाट्यगृह—या सर्व सुविधा उभारून मालवणचा कायापालट करणारच,” अशी ठाम ग्वाही त्यांनी दिली.
नगरविकास व पर्यटन विभागाच्या मदतीने मालवण शहराला आधुनिकतेकडे नेण्याचे आश्वासनही त्यांनी दिले.
प्रमुख मान्यवरांची उपस्थिती
या विराट सभेला उद्योगमंत्री उदय सामंत, आमदार निलेश राणे, माजी आमदार राजन तेली, नगराध्यक्ष पदाच्या उमेदवार ममता वराडकर, जिल्हाप्रमुख राजू सामंत, दीपलक्ष्मी पडते, बाळा चिंधरकर, संजय आंग्रे, संजय पडते आणि शिवसेनेचे इतर प्रमुख पदाधिकारी मोठ्या संख्येने उपस्थित होते.
स्थानिक नागरिकांचाही मोठा सहभाग दिसून आला.
मालवणच्या निवडणूक वातावरणात उपमुख्यमंत्र्यांच्या या सभेनंतर आणखी रंगत आली असून आगामी लढतीत शिवसेना किती प्रभावी ठरेल, याकडे सर्वांचे लक्ष आहे.
