नगरपालिका निवडणुकीच्या पार्श्वभूमीवर मालवण शहरात सोमवार दिनांक १डिसेंबर रोजी भाजपकडून भव्य शक्तीप्रदर्शन रॅलीचे आयोजन करण्यात आले असून या रॅलीमुळे संपूर्ण शहराचे राजकीय तापमान आणखी वाढण्याची चिन्हे आहेत. राज्याचे सांस्कृतिक मंत्री आशिष शेलार यांच्या प्रमुख उपस्थितीत ही रॅली निघणार असल्याने भाजप कार्यकर्त्यांमध्ये उत्साहाचं वातावरण निर्माण झाले आहे.
भाजारपेठेच्या मध्यवर्ती भागातून, १ डिसेंबर रोजी सकाळी १० वाजता, भरड ते फोवकांडा पिंपळ असा मार्ग कापत ही भव्य रॅली पार पडणार आहे. भाजप तालुकाध्यक्ष धोंडी चिंदरकर यांनी दिलेल्या माहितीनुसार, रॅलीची सांगता फोवकांडा पिंपळ येथे जाहीर सभेने होईल. या सभेत मंत्री आशिष शेलार यांच्यासह स्थानिक नेते आगामी निवडणुकीसाठी भाजपची भूमिका, योजनांचा आढावा आणि विजयाचा आत्मविश्वास मांडणार आहेत.
राजकीय निरीक्षकांच्या मते, ही रॅली मालवणच्या निवडणूक चित्राला नवा वेग देऊ शकते.
