मालवण नगरपालिका निवडणुकीत भाजप कार्यकर्त्यांनी घराघरात पोहोचविलेल्या भक्कम प्रचार यंत्रणेच्या जोरावर भाजपचे सर्व उमेदवार मोठ्या मताधिक्याने विजयी होतील, असा ठाम दावा भाजप नगराध्यक्ष पदाच्या उमेदवार सौ. शिल्पा यतीन खोत यांनी पत्रकार परिषदेत व्यक्त केला.
भाजप तालुका कार्यालयात आयोजित पत्रकार परिषदेत त्या बोलत होत्या. यावेळी तालुकाप्रमुख धोंडी चिंदरकर, जिल्हा परिषद माजी अध्यक्ष अशोक सावंत उपस्थित होते.
“जनतेच्या प्रचंड प्रतिसादामुळे विजय निश्चित” — शिल्पा खोत
सौ. खोत यांनी सांगितले की, केंद्र आणि राज्य शासनाच्या विविध योजनांचा आणि विकासकामांचा प्रत्ययकारक लाभ लोकांपर्यंत पोहोचवल्यामुळे भाजपची छाप मजबूत झाली.
मुख्यमंत्री देवेंद्र फडणवीस, पालकमंत्री नितेश राणे, खासदार नारायण राणे, तसेच प्रदेशाध्यक्ष रवींद्र चव्हाण यांच्या माध्यमातून मालवणचा सर्वांगीण विकास साध्य करण्याचे स्वप्न लवकरच साकार होईल, असा विश्वास त्यांनी व्यक्त केला.
विरोधकांनी चुकीच्या माहितीद्वारे टीका केली असली तरी मतदारांनी आम्हाला दिलेल्या साथीतून त्या सर्व खोट्या प्रचाराची हवा निघून गेली असल्याचेही सौ. खोत म्हणाल्या.
“माझे जातप्रमाणपत्र वैध असून निवडणूक आयोगानेही ते वैध ठरविले आहे,” असेही त्यांनी स्पष्ट केले.
