सावंतवाडीच्या विकासासाठी राजघराण्याची भूमिका नेहमीच जनतेसोबत राहिल्याची स्पष्ट भूमिका सावंतवाडी संस्थानचे युवराज तथा भाजयुमोचे प्रदेश उपाध्यक्ष लखमराजे भोंसले यांनी आज पत्रकार परिषदेत मांडली. मल्टीस्पेशालिटी हॉस्पिटलसाठीचा सामंजस्य करार हा शासनाकडून करण्यात आला असून, आम्ही दोन वेळा सह्या केल्या आहेत, अशी माहिती देत त्यांनी “अटी शर्ती घालण्याचा प्रश्नच येत नाही” असा ठाम दावा केला.
भोंसले पुढे म्हणाले की, “दोन एकर जमीन आम्ही मोफत दिली आहे. तरीही निवडणुकीच्या पार्श्वभूमीवर जनतेत चुकीची माहिती पसरवली जात आहे. आपल्या निवडणुकीत या कराराचा फायदा घेतला आणि आता त्याचा गैरफायदा घेतला जातोय—राजकारण कोण करतंय हे जनतेने पहावं.”
मोती तलावात हॉटेलाचा प्रस्ताव कोणी आणला? भोंसले यांचे आव्हान
मोती तलाव हे सावंतवाडीचे सौंदर्य आणि ऐतिहासिक वैभव असल्याचे सांगत युवराज भोंसले म्हणाले,
“मोती तलावाचे सौंदर्य जपण्यासाठी आणि संवर्धनासाठी राजघराण्याने कायम प्रयत्न केले आहेत. तलावात कोणतेही चुकीचे काम होऊ देणार नाही.”
आरोप करणाऱ्यांवर उलट प्रश्न उपस्थित करत त्यांनी आव्हान दिले—
“मोती तलावात कन्स्ट्रक्शन होणार असे आज म्हणणाऱ्यांनी 2003 मध्ये तलावात हॉटेल बांधण्याचा प्रस्ताव कोणी आणला होता ते जाहीर करावे.”
सुशोभीकरणाच्या योग्य कामांना कधीही विरोध नाही
तलावातील संगीत कारंजा, बोटिंग यांसारख्या पर्यटन प्रकल्पांना आम्ही कधीही विरोध केला नाही, असेही भोंसले यांनी स्पष्ट केले.
“मोती तलावाचे काँक्रिटीकरण होऊ नये आणि त्याचा ऐतिहासिकपणा जपला जावा, हा आमचा एकमेव हेतू आहे.”
विकासाच्या अजेंड्यावर राजघराणे आणि भाजप एकसंध
भोंसले म्हणाले,
“आम्ही कोणावरही टीका करत नाही. पूर्वजांनी दिलेले संस्कार हेच आमचे बळ. राजवाडा हा टॅग असला तरी आम्ही सर्वसामान्य लोकांसाठी २४ तास उपलब्ध आहोत.”
पालकमंत्री नितेश राणे, प्रदेशाध्यक्ष रवींद्र चव्हाण, आमदार दीपक केसरकर यांच्या सहकार्याने भाजपद्वारे विकासाचे प्रकल्प पुढे नेणार असल्याचे त्यांनी स्पष्ट केले.
राजवाडा बंद असल्याचा आरोप खोटा — भोंसले
राजवाड्यात प्रवेश दिला जात नाही ही टीका फेटाळून भोंसले म्हणाले,
“राजवाड्याचा गेट कधीही बंद नसतो. तिथे सुरक्षारक्षकही नाहीत. नागरिक आणि पर्यटक दररोज मुक्तपणे तिथे फिरतात. नगराध्यक्ष झाल्यावर श्रद्धा राजे नगरपालिकेतच बसणार आहेत.”
शहरात पर्यटन वाढीसाठी नवे प्रकल्प राबवणार
मुंबई–गोवा महामार्ग शहराबाहेरून गेल्याने पर्यटकांची वर्दळ कमी होऊ नये म्हणून नवे पर्यटन प्रकल्प राबविण्याचा मानस असल्याचे भोंसले म्हणाले.
“केसरीतील मत्स्य एक्वेरियमला हजारो पर्यटक भेट देतात. तसेच प्रकल्प शहरात उभारले तर पर्यटक नक्की वाढतील.”
श्रद्धा राजे मराठी जाणतात; भाषेचा मुद्दा अनाठायी
“श्रद्धा राजे मराठी वाचतात-लिहितात. भाषा किंवा प्रशासनावर त्याचा कुठलाही अडथळा नाही. भाषेचा आणि विकासाचा प्रश्न मुळातच येत नाही,” असे त्यांनी स्पष्ट केले.
“जागा उपलब्ध; मल्टीस्पेशालिटीला अडथळा स्थानिक आमदारांनी स्पष्ट करावा”
मल्टीस्पेशालिटी हॉस्पिटलसाठी आम्ही केलेल्या सह्या पुरेशा आहेत आणि यापुढेही सही आवश्यक असल्यास आम्ही तयार असल्याचे भोंसले यांनी पुन्हा सांगितले.
ते म्हणाले—
“निधी असूनही हॉस्पिटल का झाले नाही याचे उत्तर स्थानिक आमदारांनी द्यावे. जागा उपलब्ध असूनही केवळ राजकारणासाठी हा विषय दुरूपयोग केला जातोय.”
अभिनव फाउंडेशनने पुढाकार घेतल्याबद्दल त्यांनी अभिनंदनही केले आणि “जनतेच्या सेवेसाठी आम्ही कधीही मागे हटणार नाही” असे आश्वासन दिले.
सावंतवाडीतील निवडणूक वातावरणात युवराज भोंसले यांच्या वक्तव्यांनी पुन्हा एकदा मोती तलाव, मल्टीस्पेशालिटी हॉस्पिटल आणि विकासाच्या मॉडेलविषयीची चर्चा जोर धरली आहे.
