सिंधुदुर्ग : (प्रतिनिधी)
सिंधुदुर्ग जिल्हा परिषद व पंचायत समिती सार्वत्रिक निवडणूक २०२६ अंतर्गत उमेदवारी अर्ज मागे घेण्याच्या प्रक्रियेत मोठ्या प्रमाणावर हालचाली झाल्याचे चित्र स्पष्ट झाले आहे. दिनांक २४ जानेवारी २०२६ रोजी प्रसिद्ध झालेल्या अधिकृत अहवालानुसार जिल्हा परिषद आणि पंचायत समिती या दोन्ही स्तरांवर उमेदवारी माघारी नोंदवण्यात आल्या आहेत.
जिल्हा परिषदेसाठी जिल्ह्यातील ८ गटांतील एकूण ५० जागांसाठी २३१ वैध उमेदवार रिंगणात होते. यापैकी २३ जानेवारी रोजी २ उमेदवारांनी तर २४ जानेवारी रोजी तब्बल ११ उमेदवारांनी उमेदवारी अर्ज मागे घेतले. देवगड, कुडाळ, मालवण आणि कणकवली तालुक्यांत माघारीचे प्रमाण अधिक असल्याचे दिसून आले.
पंचायत समिती स्तरावर १०० गणांसाठी ३९८ वैध उमेदवार होते. यामध्ये २३ जानेवारी रोजी ३ उमेदवारांनी तर २४ जानेवारी रोजी १३ उमेदवारांनी उमेदवारी माघार घेतली आहे. देवगड, मालवण आणि सावंतवाडी तालुक्यांत पंचायत समिती निवडणुकीत माघारीचे प्रमाण लक्षणीय राहिले आहे.
विशेष म्हणजे वैभववाडी आणि दोडामार्ग तालुक्यांमध्ये माघारीचे प्रमाण तुलनेने कमी असल्याचे अहवालातून स्पष्ट झाले आहे. काही गट व गणांमध्ये माघारीनंतर बिनविरोध निवडीची शक्यता निर्माण झाली असून, पुढील टप्प्यात अधिकृत बिनविरोध यादी जाहीर होण्याची शक्यता आहे.
उमेदवारी माघारीनंतर आता जिल्ह्यातील राजकीय चित्र अधिक स्पष्ट होत असून, पुढील काही दिवसांत प्रचाराला वेग येणार असल्याचे संकेत मिळत आहेत. निवडणूक प्रशासनाकडून पुढील प्रक्रिया नियोजनानुसार राबवण्यात येणार आहे.
