- मालवण नगरपरिषद निवडणूक 2025 च्या पार्श्वभूमीवर प्रभाग 10 मधून शिवसेना उद्धव बाळासाहेब ठाकरे पक्षाचे उमेदवार तपस्वी मयेकर यांचा घराघरात जात प्रत्येक मतदारांशी संवाद साधत जोरदार प्रचार सुरु आहे. तपस्वी मयेकर आणि राधीका मोंडकर यांच्यासोबतच नगराध्यक्ष पदाचे उमेदवार सौ पुजा करलकर यांच्या विजयाबाबत नागरिकांचा असलेला विश्वास शिवसेना उबाठा गटाची ताकद वाढवणारा आहे. एकुणच तपस्वी मयेकर यांच्या जनसेवेचा आजपर्यंतचा अनुभव, विकासाची दृष्टी आणि स्पष्ट प्राधान्यक्रम जाणून घेण्यासाठी घेतलेली ही मुलाखत.
प्रश्न : खरतर हा प्रभाग तुमच्या हक्काचा आहे, आणि म्हणूनच तुमच्या प्रभागात तुमचा विकास प्राधान्यक्रम काय आहे. ?
तपस्वी मयेकर: नागरिकांच्या अपेक्षा साध्या पण अत्यंत महत्त्वाच्या आहेत. रस्ते, ड्रेनेज, पाणीपुरवठा, दिवाबत्ती, आरोग्यसुविधा, मोबाइल नेटवर्क यांसारख्या मूलभूत सुविधा व्यवस्थित हव्या आहेत. अनेक समस्या वर्षानुवर्षे प्रलंबित राहिल्यामुळे लोक त्रस्त झाले आहेत. त्यांना आता खरोखर काम करणारे, जबाबदार नेतृत्व हवे आहे—ही मागणी प्रत्येक ठिकाणी ठळकपणे जाणवते.
प्रश्न : “जनसेवेसाठी २४ तास उपलब्ध” असल्याचे आपण सांगितले. या मागचे नेमके कारण काय?
मयेकर: लोकप्रतिनिधी हा लोकांचा सेवक असतो. नागरिक अडचणीत असताना वेळ पाहून मदत केली तर त्याचे काही अर्थ राहत नाही. एखाद्या घरात पाणी नसले, रस्ता खचला, वीज गेली, आरोग्याशी संबंधित आपत्कालीन स्थिती आली—तर नागरिकांनी आपल्याकडे फोन केल्यावर “मी उद्या येतो” असे सांगता येत नाही. म्हणूनच २४ तास ही केवळ घोषणा नाही, तर माझा कार्यनिश्चय आहे.
प्रश्न : महिला व ज्येष्ठ नागरिकांसाठी खास काय योजना राबविण्याचा तुमचा विचार आहे?
मयेकर: महिलांची सुरक्षितता आणि वरिष्ठ नागरिकांची सुविधा हे आमचे प्राधान्य आहे. साथीदार उमेदवार राधिका मोंडकर या महिलांच्या प्रश्नांवर अत्यंत संवेदनशील आहेत. त्याचप्रमाणे आमच्या नगराध्यक्षपदाच्या उमेदवार सौ. पुजा करलकर ह्या कार्यक्षम लोकप्रतिनिधी आहेतच. या दोघांची कणखर साथ हा प्रभाग शिवसेना उद्धव बाळासाहेब ठाकरे गटाचा बालेकिल्ला बनवेल हे नक्की.. या प्रभागात महिला-सुरक्षा उपाययोजना, सीसीटीव्ही कॅमेरे, महिला मदत डेस्क, तसेच ज्येष्ठ नागरिकांसाठी आरोग्य शिबिरे, औषधोपचार आणि बसथांब्यांची सुविधा वाढवण्याचा आमचा मनोदय आहे.
प्रश्न : प्रभागातील पायाभूत सुविधांच्या उभारणीसंदर्भात आपला रोडमॅप नेमका कसा आहे?
मयेकर: प्रभागाचा सर्वांगीण विकास तीन टप्प्यांत करणार आहोत—
- तातडीचे उपाय: खड्डेमुक्त रस्ते, गटारे, पाणीपुरवठा व दिवाबत्ती त्वरित दुरुस्त करणे.
- स्थिर सुविधा: पक्का रस्ता आराखडा, जलकुंभांची निगा, शौचालयांची सुधारणा, कचरा व्यवस्थापन व्यवस्था मजबूत करणे.
- भविष्योन्मुख विकास: डिजिटल सुविधा, स्मार्ट स्ट्रीटलाईट्स, मंदिर-संकुलांचे सुशोभीकरण, हिरवळ वाढवणे आणि स्वच्छ-सुरक्षित प्रभाग उभारणे.
प्रश्न : नागरिकांचा प्रतिसाद कसा मिळतो आहे?
मयेकर: अतिशय उत्स्फूर्त! प्रत्येक वाड्यात, गल्लीत लोक हातात हात घेऊन पुढे येत आहेत. ते म्हणतात—“आम्हाला काम करणारे नेतृत्व हवे!”—ही वाक्ये आमच्यासाठी मोठा विश्वासाचा आधार आहेत. नागरिक आम्हाला कुटुंबवत्सल, तत्पर आणि काम करणारी टीम मानतात. हा पाठींबा आमचे बळ आहे.
प्रश्न : अखेर मालवणवासीयांना तुम्ही कोणता संदेश द्याल?
मयेकर:
“मला मिळणारा प्रत्येक पाठींबा ही माझ्यासाठी मोठी जबाबदारी आहे. आपण दाखवलेला विश्वास वाया जाणार नाही, याची मी खात्री देतो. प्रभागातील प्रलंबित कामे पूर्ण करून, सर्वांना समान न्याय देत मालवणचा विकास वेगवान करण्यासाठी आम्ही कटिबद्ध आहोत. संधी द्या — काम करून दाखवू!”
